Bu gün (26 iyul) Sumqayıt Apellyasiya Məhkəməsində hakim Lətifə Məmmədovanın sədrliyi ilə gənc fəal Cabbar Savalanlının 2 il 6 ay müddətinə azadlıqdan məhrum edilməsi barədə Sumqayıt şəhər Məhkəməsinin 4 may 2011-ci il tarixdə çıxardığı hökmdən verilmiş apellyasiya şikayəti üzrə keçirilən məhkəmə prosesi iddianın təmin edilməməyi ilə yekunlaşdı.
Məhkəmə iclasında ilk olaraq ötən iclaslar zamanı müdafiə tərəfin təmin olunmuş vəsatətinə əsasən hal şahidi Rəhim Şıxəliyevin dindirilməsi nəzərdə tutulsa da, onun xəstələnməsi səbəbindən məhkəməyə gəlmədiyi bildirildi. Vəkil hal şahidi Rəhim Şıxəliyevin Sumqayıt narkoloji dispanserində 2000-ci ildən qeydiyyatda olması barədə sənədi hakimə təqdim etdi.
Gənc fəal C. Savalanlı isə son sözündə ona verilən cəzanın sifarişli olduğunu, eləcə də həbsinin siyasi baxışları səbəbindən təşkil olunduğunu məhkəməyə bildirdi.
Müşavirədən qayıdan məhkəmə tərkibi Sumqayıt şəhər Məhkəməsinin 4 may 2011-ci il tarixdə çıxardığı hökmün qüvvədə saxlanması barədə qərarını elan etdi.
Prosesdən sonra gənc fəalın həbsinə etiraz edən AXCP Gənclər Komitəsinin sədri Əbülfəz Qurbanlı və gənc fəal Kamran Sanatürk məhkəmənin qarşısında dayanan polis əməkdaşları tərəfindən saxlanılaraq, 1 saatdan sonra sərbəst buraxılıblar.
Xatırladaq ki, Cabbar Savalanlı fevralın 5-də qanunsuz narkotik saxlamaq ittihamı ilə həbs edilib. Cabbar Savalanlıya Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi açılıb. Sumqayıt Şəhər Məhkəməsi Cabbar Savalanlının 2 il 6 ay müddətinə azadlıqdan məhrum edilməsi barədə 4 may 2011-ci ildə hökm verib.
Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.