“Azərbaycan Milli Dövlətçilik Partiyasının sədri Nemət Pənahlının həyatına təhlükə var. Onun cəza çəkdiyi kameraya iyulun 25-də ikiqat ölümdə təqsirli bilinərək həbs edilən bir nəfər salıblar və o keçən gecə lezva ilə Nemətin boğazını kəsmək istəyib”. Bu barədə RATİ-yə N.Pənahlının qardaşı Səməd Pənahlı məlumat verdi. O bu qəsdə cəhd faktı barədə daha geniş məlumatı ayın 28-də keçirəcəyi mətbuat konfransında verəcəyini deyib.
Xatırladaq ki, 2011-ci il yanvarın 8-də Azərbaycan Milli Dövlətçilik Partiyasının sədri Nemət Pənahlı öz dostu Ceyhun Fərzullayev ilə birlikdə vətəndaş Eldar Rzayevin şikayəti əsasında saxlanılıb. Yanvarın 10-da Nəsimi rayon Məhkəməsi Pənahlı və Fərzullayevi Cinayət Məcəlləsinin 221.3 maddəsi ilə (silah və ya silah qismində istifadə edilən əşyaları tətbiq etməklə xuliqanlıq) iki ay müddətinə həbs edib. Münaqişəyə səbəb Pənahlının Rzayevə satdığı avtomobil olmuşdu. Yanvarın 17-də Bakı Apellyasiya Məhkəməsi bu qərarı qüvvədə saxlamışdı. İyunun 17-də isə Nəsimi rayon Məhkəməsində hakim Elman Əhmədovun sədrliyi ilə Azərbaycan Milli Dövlətçilik Partiyasının sədri Nemət Pənahlı və onun dostu Ceyhun Fərzullayevin işi üzrə məhkəmə hökmü elan edilib. Hakim Elman Əhmədov Azərbaycan Milli Dövlətçilik Partiyasının sədri Nemət Pənahlının 6 il, onun tanışı Ceyhun Fərzullayev barəsində isə 4 il müddətinə azadlıqdan məhrum edilməsi barədə hökm çıxarıb.
Pənahlının doğmaları və yaxınları isə hesab edirlər ki, onun və dostunun həbsi "P.S. Nota" qəzetində və ümumiyyətlə mətbuatda hakimiyyətin ünvanına söylədiyi tənqidi fikirlərlə bağlıdır.