Bu gün (14 iyun) Gənc Siyasi Məhbusların Müdafiə Komitəsi (GSMMK) Amerika Birləşmiş Ştatlarının Prezidenti Barak Obamaya və Avropa Şurası Parlament Assambleyasının üzvlərinə müraciət edib.
Müraciətin ünvanlandığı şəxslər son dövrlərdə siyasi motivlərə görə Azərbaycanda həbs edilən gənclərin azadlığa buraxılması istiqamətində səylərini artırmağa və bu məsələni Azərbaycanın rəsmiləri qarşısında qaldırmağa çağırılır.
Müraciətdə AXCP Gənclər Komitəsinin Sumqayıt şəhər üzrə koordiantoru Cabbar Savalanlının və bitərəf fəal Bəxtiyar Hacıyevin saxta ittihamlarla azadlıqdan məhrum edilmələri, 2005-ci ildə həbs edilən Ruslan Bəşirlinin hələ də həbsxanada qalması, o cümlədən 2011-ci ilin 2 aprel tarixində keçirilən dinc etiraz aksiyasına görə həbs edilən gənclər – Müsavat Partiyasının Gənclər Komitəsinin sədri Tural Abbaslı, onun müavinləri Əhəd Məmmədli və Rüfət Hacıbəyli, AXCP gənclər Komitəsinin üzvü Elnur Məcidli, bitərəflər Ülvi Quliyev və Elnur İsrafilovun da təqsirsiz olaraq “cəzalandırılması” ehtimalı barədə narahatçılıq ifadə edilir.