Bu gün (12 oktyabr) Bakı Apellyasiya Məhkəməsində hakim Camal Ramazanovun sədrliyi ilə “Yeni Fikir” Gənclər Hərəkatının sədri Ruslan Bəşirlinin vaxtından əvvəl azad edilməsi ilə bağlı ilkin məhkəmənin iddianı təmin etməyən qərarından verilən apellyasiya şikayəti üzrə məhkəmə prosesi keçirilib.
Hakim ilk instansiya məhkəməsinin qərarını qüvvədə saxlayıb. Bu barədə bu gün Reportyorların Azadlıq və Təhlükəsizlik İnstitutuna (RATİ) Bəşirlinin vəkili Tahir Xanəliyev məlumat verib.
Vəkil T. Xanəliyev hakimin ilkin məhkəmə qərarını qüvvədə saxladığını və şikayətin təmin edilmədiyi barədə qərar verdiyini deyərək, bu qərardan kassasiya şikayəti veriləcəklərini bildirdi.
Qeyd edək ki, R. Bəşirlinin ilkin instansiya məhkəməsi 22 avqust 2011-ci il tarixində 1 saylı cəzaçəkmə müəssisəsində hakim Azər İsmayılovun sədrliyi ilə keçirilib və Ruslan Bəşirlinin vaxtından əvvəl azad edilməsi ilə bağlı müraciəti təmin edilməyib.
Xatırladaq ki, “Yeni Fikir” Gənclər Hərəkatının sədri Ruslan Bəşirli 2005-ci ilin 18 may tarixində parlament seçkiləri ərəfəsində həbs edilib. 2006-cı ilin iyulun 12-də Ağır Cinayətlərə Dair İşlər üzrə Məhkəmə Ruslan Bəşirlini Cinayət Məcəlləsinin 278-ci maddəsi ilə (hakimiyyəti zorla ələ keçirmə) ilə təqsirli bilərək 7 il müddətinə azadlıqdan məhrum edib. “Yeni Fikir” Gənclər Təşkilatı sədrinin 2005-ci ilin parlament seçkiləri ərəfəsində Müsavat, AXCP, ADP-nin yaratdığı “Azadlıq” seçki blokunun mitinqlərində nümayiş etdirdiyi fəallığına görə şərlənərək həbs edilib.