Prosesdə “Təzadlar” qəzetinin baş redaktoru Asif Mərzilinin “iş materiallarının İqtisad Məhkəməsinə göndərilməsi” barədə vəsatətinin təmin edilməməsi ilə bağlı 30 mart 2010-cu il tarixli qərardaddan verilmiş şikayətə baxılıb və iş materiallarının baxılması üçün apellyasiya məhkəməsinə göndərilməsinə qərar verilib.
Həmçinin Əflatun Amaşova qarşı iddiasının təmin edilməməsi ilə bağlı 30 mart 2010-cu ildə çıxarılmış qətnamədən A.Mərzilinin verdiyi şikayətin apellyasiya məhkəməsinə göndərilməsinə qərar verilib.
Daha sonra məhkəmənin “Mətbuat Şurasının (MŞ) sədri Ə.Amaşovun qanunsuz hərəkətlərinə qadağa qoyulması” barədə 30 mart 2010-cu ildə çıxarılmış qərardaddan qarşı tərəfin verdiyi şikayət təmin edilməyib və qərardad qüvvədə saxlanılıb.
Xatırladaq ki, “Təzadlar” qəzetinin 29 avqust 2009-cu il tarixli sayında Türkiyə-Ermənistan sərhədlərinin açılması ilə bağlı məqalə dərc olunduqdan sonra MŞ həmin ilin sentyabr ayının 16-da qəzeti “qara siyahıya” daxil edib. A.Mərzili şərəf və ləyəqətin müdafiəsi ilə bağlı bağlı məhkəmədə iddia qaldıraraq cavabdehin təzminat ödəməsini istəyib. O, həmçinin hüquqi şəxs olaraq “Təzadlar” qəzeti adından Mətbuat Şurasına qarşı da iddia qaldırıb.