Hazırda Mütəşəkkil Cinayətkarlığa qarşı Mübarizə İdarəsində saxlanılan Xəyal” telekanalının icraçı direktoru Vüqar Qonaqov və televiziyanın baş redaktoru Zaur Quliyevə vəkilləri Elçin Sadıqovla görüş verilməyib.
Belə ki, martın 13-də “Xəyal” telekanalının icraçı direktoru Vüqar Qonaqov, baş redaktor Zaur Quliyev və daha bir neçə media nümayəndəsi saxlanılaraq Bakıya gətirilib. Bunlardan daha sonra Poliqon İnformasiya Agentliyinin müxbiri Cəmil Məmmədli, “Xəyal” TV-nin meneceri Zaur Mustafayev, montajçılar Vahid İbrahimovun və İslam Aslanov azad ediliblər. Buna baxmayaraq Vüqar Qonaqov və Zaur Quliyev haqqında Baş Prokurorluğun Ağır Cinayətlərə Dair İşlər Üzrə İstintaq İdarəsi tərəfindən irəli sürülmüş Azərbaycan Respublikası Cinayət Məcəlləsinin 233 (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 309.2 (Vəzifə səlahiyyətlərini aşma) maddələri ilə cinayət işi açılıb. Ağır Cinayətlərə Dair İşlər üzrə Məhkəmənin qərarı ilə hər iki media nümayəndəsi haqqında 2 ay müddətinə həbs qətimkan tədbiri seçilib.
Xatırladaq ki, Quba rayonun sabiq icra başçısı Rauf Həbibovun 2011-ci ilin yekunlarına dair müşavirədə səsləndirdiyi və sonra sosial şəbəkələrdə yayılan çıxışında “Qubalılar öz ailə uşaqlarını, vətənini 30-40 mata satırlar” ifadəsi rayon əhalisini hiddətləndirib və bu səbəbdən 2012-ci il mart ayının 1-də Quba rayonunda kütləvi etiraz aksiyası keçirilib, aksiya iştirakçıları R.Həbibovun evini yandırıblar, əhali ilə polis və daxili qoşun hissələri əsgərləri arasında qarşıdurma olub. Qarşıdurma nəticəsində icra başçısı Prezident İlham Əliyev tərəfindən vəzifəsindən çıxarılıb.