“AZADLIQ” QƏZETİNİN BÖLGƏ MÜXBİRİ POLİSƏ ÇAĞIRILIB

yanvar 18th, 2010
“Azadlıq” qəzetinin Gəncəbasar müxbiri Ərşad İbrahimli polis şöbəsinə çağırılıb.  Bu barədə Reportyorların Azadlıq və Təhlükəsizlik İnstitutuna (RATİ) məlumat verən Ə. İbrahimli bildirib ki, yanvarın 14-də Gəncənin Nizami rayon Polis Şöbəsinin əməkdaşları tərəfindən axtarılıb.

Jurnalist həmçinin qeyd edib ki, onunla telefon əlaqəsi saxlayan Nizami RPŞ-nin əməliyyat müvəkkili Siyavuş Şükürovdan polis şöbəsinə gəlmək üçün rəsmi çağırış vərəqəsi göndərməyi tələb edib: “Bundan sonra isə Nizami RPŞ-nin rəisi Ağahüseyn Məmmədov özü mənə zəng vuraraq təcili şöbəyə gəlməyimi tələb etdi. Gəlməyəcəyim təqdirdə isə bunun mənimçün ağır olacağını bildirdi”.

Dəfələrlə belə təzyiqlərlə üzləşdiyini deyən Ə.İbrahimli bu dəfə təqiblə üzləşməsinə bir neçə gün öncə bir qrup təhsil işçisinin İcra Hakimiyyətinin qarşısında keçirmək istədikləri aksiyanı işıqlandırdığının səbəb olduğunu ehtimal edir.
Gəncə şəhər Nizami RPŞ-nin rəisi Ağahüseyn Məmmədov  RATİ əməmkdaşı ilə telefon əlaqəsi zamanı jurnalistin polis idarəsinə çağırılmasını təsdiqləyib. Ə.İbrahimlinin hansı səbəbdən polisə çağırılmasına isə rəis aydınlıq gətirməyib. “İstənilən şəxs polis şöbəsinə çağırıla bilər. Bunun üçün rəsmi çağırış vərəqəsi vacib deyil. O, sadəcə yersiz hay-küy salır” – deyən polis rəisi əlavə etdi ki, Ə.İbrahimli çağırılmağının səbəbini isə şöbəyə gələrək öyrənə bilər.

Qeyd edək ki, “Azadlıq” qəzeti 1989-cu ildən çıxır və gündəlik qəzet kimi fəaliyyət göstərir.