YUNESKO-nun əməkdaşı təmsil etdiyi qurumun təbrikini oxuyub. Daha sonra müzakirələr başlayıb.
“Ayna-Zerkalo” qəzetinin baş redaktoru Elçin Şıxlı media sahəsində ölkədə normal rəqabət mühiti olmadığını deyib. O bu halın davam edəcəyi təqdirdə ölkədə cəmi 5-6 çap mediasının qalacağını söyləyib. Eyni zamanda natiq mədəni səviyyə artdıqca qəzetçilikdən xəbəri olmayanların qəzet nəşrindən geri duracaqlarını vurğulayıb.
“Bakı Xəbər” qəzetinin redaktoru Aydın Quliyev isə ölkə jurnalistlərində “daxili senzura”nın gücləndiyini deyərək bunun özünü anormallıq adlandırıb. Natiq jurnalistlərə qarşı baş verən kobudluqların, qanunsuz hərəkətlərin bu anormallığı artırdığını deyərək qanunsuzluqlara qarşı çıxış edib.
Bu ilin martında “Azadlıq” qəzetinin köşə yazarı Seymur Həzinin, aprel ayında isə qəzetin əməkdaşı Ramin Dekonun fiziki zorakılıqlara məruz qalması ilə bağlı vəziyyətin araşdırılmasının nə yerdə olması haqda verilən suala Mətbuat Şurasının sədri Əflatun Amaşov kamera önündə cavab verməkdən çəkinib. Kamera çəkilişi dayandırıldıqdan sonra isə Əflatun Amaşov bu məsələdə hüquq-mühafizə orqanları ilə əlaqəni Media Hüququ institutunun direktoru Rəşid Hacılının saxlamalı olduğunu söyləyib. Amaşov bu məsələ ilə bağlı bu gün güc strukturları ilə əlaqə saxlayacağını deyib və Mətbuat Şurasının bu zorakılığın üstünün açılmasında, cinayətkarların cəzalandırılmasında maraqlı olduğunu qeyd edib.