Dünən (11 yanvar) Nəsimi rayon Məhkəməsində hakim Səyyad Qəfaninin sədrliyi ilə vətəndaş Eldar Rzayevin şikayətinə əsasən Azərbaycan Milli Dövlətçilik Partiyasının (AMDP) sədri Nemət Pənahlı və onun dostu Ceyhun Fərzullayevə qarşı Cinayət Məcəlləsinin (CM) 221.3-cü (silah və silah qismində istifadə edilən əşyalar tətbiq etməklə xuliqanlıq etmə) maddəsi ilə növbədənkənar məhkəmə prosesi keçirilib. Bu barədə bu gün (11 yanvar) Reportyorların Azadlıq və Təhlükəsizlik İnstitutuna (RATİ) N. Pənahlının vəkili Elçin Sadıqov məlumat verib.
“Nəsimi rayon prokuroru Aqşin Ziyadov vəsatətin əsaslı olub-olmadığına baxdıqdan sonra məhkəməyə təqdimat verəcək. İki saat çəkən iclasda hakim onların hər ikisinin barəsində iki ay həbs-qətimkan tədbiri seçilməsi barədə qərar çıxartdı. Bu gün isə N. Pənahlı və C. Fərzullayev Bakı İstintaq Təcridxanasına köçürüləcəklər”.
Qeyd edək ki, dünən keçirilən məhkəmə prosesinin saat 14:00 və 15:00 arası keçiriləcəyi bildirilsə də, məhkəmə prosesi axşam saatlarına qədər uzanıb və media nümayəndələri məhkəmə zalına buraxılmayıb.
Xatırladaq ki, Azərbaycan Milli Dövlətçilik Partiyasının (AMDP) sədri Nemət Pənahlı yanvarın 8-də mülki geyimli şəxslər tərəfindən saxlanılaraq Nəsimi Rayon Polis İdarəsi (RPİ) 21-ci polis bölməsinə aparılıb. N.Pənahlının saxlanmasına səbəb yanvarın 7-də vətəndaş Eldar Rzayevin polisə müraciəti olub. O, Mirəli Qaşqay küçəsində N. Pənahlı və onun tanışı Ceyhun Fərzullayev tərəfindən yumruq və metal əşya vasitəsilə döyüldüyünü iddia edərək, polisə müraciət edib. Hər iki şəxs barəsində Cinayət Məcəlləsinin (CM) 221.3-cü (silah və silah qismində istifadə edilən əşyalar tətbiq etməklə xuliqanlıq etmə) maddəsi ilə cinayət işi başlanıb.
Yaxınlarının verdiyi məlumata görə, əslində N.Pənahlı namizəd kimi iştirak etdiyi 7 noyabr 2010-cu il parlament seçkiləri zamanı, seçkilərdən sonra mətbuatda, xüsusilə də “Nota PS” qəzetlərində dərc olunan sərt fikirlərinə görə şərlənərək həbs edilib.
Qeyd edək ki, Nemət Pənahlı 1962-ci ildə Naxçıvanda anadan olub. 1980-ci illərin sonunda xalq azadlıq hərəkatına qoşularaq onun öncül simalarından olub. Azərbaycan Xalq Cəbhəsinin qurucularındandır. 1990-cı illərin əvvəllərində Heydər Əliyevin tərəfdarlarına qoşulub və mərhum prezidentin hakimiyyətinin ilk illərində Prezident Administrasiyasında yüksək vəzifədə işləyib. 1995-ci ildə parlament seçkisinin saxtalaşdırıldığını iddia edərək istefa verib.
Bir müddət fəal siyasətdən uzaqlaşan Nemət Pənahlı 2010-cu il noyabrında 7-də keçirilən parlament seçkisində 15 saylı Yasamal birinci seçki dairəsindən deputatlığa namizədliyini irəli sürüb. Seçkiyə bir həftə qalmış namizədlərdən birinin xeyrinə saxtakarlıq ediləcəyi iddiası ilə kampaniyanı dayandırıb.