AZƏRBAYCAN MEDİA OMBUDSMANI İNSTİTUTUNUN YARADILMASINDAN İMTİNA ETDİ

dekabr 21st, 2010
   Milli Məclisin dekabrın 20-də keçirilən  plenar iclasında “Ombudsman haqqında” Konstitusiya qanununa dəyişikliklərin və əlavələrin edilməsi birinci oxunuşda qəbul edilib(“Turan”). Layihəni parlamentin hüquq siyasəti və dövlət quruculuğu komitəsinin rəhbəri Əli Hüseynov təqdim edib.

Layihə ölkə prezidentinin təşəbbüsü olduğundan Ə.Hüseynov KİV üzrə ombudsmanın səlahiyyətlərinin hazırkı ombudsmana verilməsini ciddi əsaslandırmağa çalışıb. Onun sözlərinə görə, “İnformasiya əldə edilməsi haqqında” qanunda KİV-də problemlərə nəzarət institutunun yaradılması da  nəzərdə tutulub. Amma o hesab edib ki,  belə institutun yaradılmasına zərurət yoxdur: “Bu qurumu mövcud ombudsman institutu ilə birləşdirmək olar.  “İnformasiya əldə edilməsi haqqında” qanunda nəzərdə tutulan səlahiyyətlərin indiki ombudsmana verilməsi düzgün olardı. Fikrimcə, ombudsman böyük təcrübəyə malikdir və informasiya ombudsmanı vəzifəsini də yerinə yetirə bilər”.

Deputat Elmira Axundova ayrıca informasiya ombudsmanı institutunun yaradılmasına tərəfdar olduğunu bildirib. Çünki onun fikrincə, indiki ombudsmanın çox vəzifəsi var, digər tərəfdən də KİV üzrə ombudsman vəzifəsi bir qədər spesifikdir.
            Deputat İqbal Ağazadə də hesab edib ki, informasiya ombudsmanı ayrıca institutdur və daha bir ayrıca institut da uşaq hüquqları üzrə olmalıdır.
            Vitse-spiker Bahar Muradova isə hesab edib ki, ayrı-ayrı ölkələrdə ayrı-ayrı sahələr üzrə ombudsman institutu fəaliyyət göstərir. “Biz ombudsmanın fəaliyyətinin koordinasiya şəklində həyata keçirilməsinə tərəfdarıq. Yəni, informasiya ombudsmanı, insan haqları və uşaq hüquqları üzrə ombudsman bir şəxsin simasında cəmləşə bilər”.
            Beləliklə, layihə 111 səs lehinə, 1 səs əleyhinə olmaqla qəbul olunub.

Xatırladaq ki,  Azərbaycanda 2005-ci ildə qəbul edilmiş “İnformasiya əldə etmək haqqında” qanunda media ombudsmanı institutunun yaradılması nəzərdə tutulurdu. Amma Azərbaycan Respublikası Prezidentini təklifi ilə “İnsan hüquqları üzrə müvəkkil (ombudsman) haqqında” Konstitusiya qanununa  yeni – 13-1 maddə əlavə edilib. “İnformasiya əldə etmək hüququnun pozulmasına dair şikayətə baxılmasının xüsusiyyətləri” kimi tövsiyə edilən 16 bənddən  ibarət yeni maddə ilə media ombudsmanının səlahiyyətləri  İnsan haqları üzrə müvəkkilə (ombudsman) verilir.