Ədliyyə Nazirliyinin məhkəmə icraçılarının Nərimanov rayon şöbəsi Prezident Administrasiyasının rəhbəri, akademik Ramiz Mehdiyevin “Xural” qəzetinə qarşı iddiasına əsasən dəyən mənəvi zərərə görə Azərbaycanın məhkəmə instansiyalarının məhkəmə qərarı ilə 10.000 (on min) manat məbləğində pulun 10 gün müddətində ödənilməsi barədə “Xural” qəzetinin redaksiyasına bildiriş göndərib.
“Aydın məsələdir ki, qəzetin maddi durumu bu məbləği ödəyəcək səviyyədə deyil. Odur ki, yaranmış problemin həlli tələbi ilə redaksiya kollektivi olaraq aclıq etmək qərarına gəlmişik”, – deyə qeyd edən baş redaktor aclıq aksiyasına başlayacaqları tarix barədə məlumat verəcəklərini qeyd etdi.
Xatırladaq ki, iddiaçı “Xural” qəzetinin 23 may 2010-cu il tarixli buraxılışında “Ramiz Mehdiyevin Bəxtiyar Vahabzadəni bitirmə planı!!! Prezident Administrasiyasının rəhbəri nədən Şəki camaatını və icra başçısını cəzalandırmalı oldu?” başlıqlı məqalədə yazılanların təkzib edilməsi, üzr istənilməsi və mənəvi zərərə görə 10.000 (on min) manat pul tutularaq, Binə qəsəbəsində yerləşən ”Ümid yeri ” Uşaq Evinə köçürülməsi barədə iddia qaldırmışdı. Nərimanov Rayon Məhkəməsində hakim Rasim Kazımovun sədrliyi ilə keçirilən prosesdə Ramiz Mehdiyevin iddiası tam təmin edilib. Sentyabrın 1-də Bakı Apellyasiya Məhkəməsi Nərimanov rayon Məhkəməsinin qərarını qüvvədə saxlayıb. Ali Məhkəmə noyabrın 17-də apellyasiya məhkəməsinin qərarının qüvvədə saxlanılması barədə qərar elan edib.
Qeyd edək ki, Xural” qəzeti 2002-ci ilin oktyabr ayında fəaliyyətə başlayıb və həftəlik dərc olunur.