Əjdər bəy ixtisasca memar idi. Gözəl rəssamlığı, karikatura çəkməyi vardı. Rəsm əsərlərindən ibarət sərgisi açılmışdı. Yüksək zövqü onun fotolarına sənət əsəri dəyəri qazandıra bilmişdi. Çəkdiyi fotolara görə “Media açarı” mükafatı almışdı. Əjdər Nağıyevin mövzu müxtəlifliyi ilə seçilən, saysız anları əbədiləşdirən yaradıcılığında Azərbaycan xalqının 1988-ci ildən başlayan azadlıq mübarizəsinin əksi olan sənədli fotolar önəmli yer tutur . Bu fotoların hər biri tarixin yaddaşına, faktların təsdiqinə çevrilib. Müəllifini illər boyu yaşadacaq.
Onun əsas iş yeri “Azadlıq” qəzeti olsa da, fotoşəkilləri ölkəmizin bir çox mətbu nəşrlərinin səhifələrini bəzəyirdi. Son iş yeri “Simsar” jurnalı olub. Əjdər Nağıyev qarlı dağlar qoynunda, doğulduğu kənddə dəfn edilib. Allah rəhmət eləsin!