“Xural” qəzetinin baş redaktoru Əvəz Zeynallı, “Reytinq” qəzetinin baş redaktoru Afiq Mirzəbəyli və “Milli yol” qəzetinin baş redaktoru Şahin Ağabəyli Müstəqil Media Uğrunda Hərəkat təsis ediblər.
Bu barədə bu gün (26 iyul) Reportyorların Azadlıq və Təhlükəsizlik İnstitutuna (RATİ) “Xural” qəzetinin baş redaktoru Əvəz Zeynallı məlumat verib. Onun sözlərinə görə, yeni hərəkat mətbuata, xüsusilə də həftəlik qəzetlərə qarşı qoyulan ayrı-seçkiliyə qarşı mübarizə aparacaq. “Dövlətin KİV-ə ayırdığı yardımın bir çox müstəqil mətbu orqanlara, xüsusilə də həftəlik qəzetlərə verilməməsi KİV-in İnkişafına Dövlət Dəstəyi Fondunun və Mətbuat Şurasının ayrı-seçkilik salmasının nəticəsidir. Ümumiyyətlə, dəfələrlə mətbuata qarşı ayrı-seçkilik hallarına yol verilməsinin şahidi olmuşuq. Bu səbəbdən də müstəqil medianın hüquqlarının qorunması üçün alternativ media axtarışındayıq” – deyən Əvəz Zeynallı əlavə etdi ki, bu məqsədlə ölkədə fəaliyyət göstərən KİV-lərin və jurnalist təşkilatlarının, o cümlədən bu sahə ilə bağlı dövlət qurumlarının rəhbərləri ilə görüşlərin keçirilməsi nəzərdə tutulub. O, əlavə etdi ki, Müstəqil Media Uğrunda Hərəkatı ayda bir dəfədən az olmayaraq müstəqil KİV-in problemlərinin müzakirəsi üçün Media Forumları keçirəcək. Əvəz Zeynallı yaxın günlərdə Hərəkatın təsis olunması ilə bağlı mətbuat konfransı keçirəcəklərini və ictimaiyyətə geniş məlumat veriləcəyini vurğuladı.