“Eynulla Fətullayev və gənc bloqçular Emin Milli və Adnan Hacızadənin azadlığa buraxılması kimi addımlar ataraq, ölkədə siyasi iqlimi yumşaltmaq əvəzinə Azərbaycan Avropa Şurasında özünü təbliğ etməyə üstünlük verir.
Mən bu işlə məşğul olan müəyyən lobbinin olduğunu hiss edirəm“. Bunu “Turan”a müsahibəsində Avropa Şurası Parlament Assambleyasının (AŞPA) Estoniyadan olan deputatı, Azərbaycan üzrə həmməruzəçi Andres Herkel deyib. O, həmməruzəçi kimi 5 il işləməli olduğunu, lakin bu postda fəaliyyətinin artıq 6-cı ilə keçdiyini vurğulayaraq, bu müddət ərzində müşahidə etdiyi problemlərdən təəssüfləndiyini bildirib. Herkel Avropa İnsan Hüquqları Məhkəməsinin qərarına rəğmən hakimiyyətin Eynulla Fətullayevi azadlığa buraxmaqdan imtina etməsini mövcud problemlərdən biri kimi göstərib və bildirib ki, bu, parlament seçkiləri ərəfəsində neqativ situasiya yaradır.
Herkel əlavə edib ki, iyunun 24-də AŞPA Monitorinq Komitəsinin həmməruzçisi qismində fəaliyyətini başa vurur. “Son sözümü məhz həmin gün deyəcəm” – deyə Herkel vurğulayıb.