Bu gün (12 avqust) Reportyorların Azadlıq və Təhlükəsizlik İnstitutunun (RATİ) mətbuat mərkəzində Azadlığın və Sülhün Müdafiəsi Beynəlxalq Hüquq Təşkilatının Azərbaycan nümayəndəliyinin
Siyasi Məhbusların Hüquqlarının Müdafiə Komitəsinin təşkilatçılığı ilə siyasi məhbus Eynulla Fətullayev barəsində ANS televiziyasında efirə verilmiş və Mirşahin Ağayevin müəllifi olduğu “Bədbəxt adam” filmi ilə bağlı mətbuat konfransı keçirilib.
Tədbirdə çıxış edən təşkilatın həmsədri Miralim Bəhramov bildirdi ki, mətbuat konfransının məqsədi Eynulla haqqında efirə verilmiş filmə etiraz etməkdir. O, “Bədbəxt adam” filmi sifariş əsasında hazırlandığını deyərək, Mirşahin tərəfindən Fətullayev barəsində səsləndirilən fikirlərin heç bir fakta əsaslanmayan, qeyri ciddi fikirlər olduğunu vurğuladı. M.Bəhramov əlavə etdi ki, əsas məqsəd jurnalisti xalqın gözündən salmaq və onun haqqında mənfi rəy formalaşdırmaq olsa da, xalq əsil həqiqəti bilir.
M.Bəhramov Eynulla Fətullayev Siyasi Məhbusların Hüquqlarının Müdafiə Komitəsinin bəyanatını da tədbir iştirakçılarına təqdim etdi. Bəyanatda sifarişli olduğu vurğulanana sözügedən filmdən narahatçılıq ifadə olunub.
Qeyd edək ki, avqustun 8-də ANS telekanalında efirə verilən “Bədbəxt adam” (Fətullayev Azərbaycana qarşı) filmində Eynulla Fətullayevə qarşı açıq şəkildə “qara piar” aparılıb. 20 dəqiqəlik filmdə əqidəsiz insan kimi təqdim olunan jurnalist Fətullayevin Azərbaycana düşmən olan ölkə – Ermənistana xidmət etməsi kimi məqamlar xüsusi qabardılıb. Filmin müəllifi, ANS şirkətlər qrupunun vitse-prezidenti Mirşahin Ağayev Eynulla Fətullayevin jurnalist fəaliyyətinə görə həbs olunmadığını da tamaşaçıya aşılamağa çalışıb.
Xatırladaq ki, E.Fətullayev 2007-ci il aprelin 20-də Qaçqın və Məcburi Köçkünlərin Hüquqlarını Müdafiə Birliyinin sədri Tatyana Çaladzenin iddiasına əsasən Yasamal Rayon Məhkəməsinin qərarı ilə məhkəmə zalında həbs edilib. Həbs edildikdən bir ay sonra “Realnıy Azerbaydjan” qəzetində dərc olunan və Azərbaycanda işləyən xarici ölkə vətəndaşları və beynəlxalq qurumlarda təşviş yaratdığı iddia olunan yazı ilə əlaqədar Milli Təhlükəsizlik Nazirliyinin Baş İstintaq İdarəsində E.Fətullayevlə bağlı cinayət işi başlanıb. Cinayət Məcəlləsinin 214.1-ci (terrorçuluqla hədələmə) və 283.2.2-ci (qulluq mövqeyindən istifadə etməklə milli, irqi, sosial və ya dini nifrət və düşmənçiliyin salınması) maddələri ilə ittiham irəli sürülüb və məhkəmə yoluyla onun barəsində həbs-qətimkan tədbiri seçilib. Sonradan istintaq E.Fətullayevi külli miqdarda vergidən yayınmada (213.2.2-ci maddə) da ittiham edib. 2007-ci il oktyabrın 30-da Ağır Cinayətlərə Dair İşlər üzrə Məhkəmənin qərarı ilə E.Fətullayev 8 il 6 ay müddətinə azadlıqdan məhrum edilib və ona 242 min 522 manat həcmində cərimə kəsilib.
Əlavə edək ki, İnsan Hüquqları üzrə Avropa Məhkəməsi “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevin işi üzrə qərar verib. Aprelin 22-də açıqlanan qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir.
Xatırladaq ki, 06 iyul 2010-cu ildə Eynulla Fətullayev Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) təqsirli bilinərək, 2 il 6 ay müddətinə azadlıqdan məhrum edilib və hökmün icrası elan edildiyi gündən hesablanır. Bu hökm 29 dekabr 2009-cu ildə isə 12 saylı Cəzaçəkmə Müəssisəsində Fətullayevin üzərindən 0,223 qram heroin tapılması ilə bağlı irəli sürülmüş ittiham üzrə çıxarılıb. Eynulla Fətullayev, vəkili, həmçinin bir çox yerli və beynəlxalq təşkilatlar bu təxribatı jurnalistin həbsi ilə bağlı Avropa İnsan Haqları Məhkəməsinin qərarının qarşısını almaq məqsədilə əvvəlcədən qurulmuş təxribat kimi qiymətləndirir. Eynulla Fətullayev bir çox yerli və beynəlxalq təşkilatlar tərəfindən vicdan məhbusu kimi tanınır.
Qeyd edək ki, 2005-ci ildən Eynulla Fətullayevin təsisçiliyi və baş redaktorluğu ilə “Realnıy Azerbaydjan” qəzeti həftəlik, “Gündəlik Azərbaycan” qəzeti isə gündəlik nəşr olunub. 2007-ci ildə baş redaktorun həbsindən sonra hər iki qəzet fəaliyyətini dayandırıb.