İNSAN HÜQUQLARI KLUBU AZƏRBAYCANDAKI SON VƏZİYYƏTDƏN NARAHATDIR

yanvar 19th, 2011
Yanvarın 19-da Reportyorların Azadlıq və Təhlükəsizlik İnstitutunun mətbuat mərkəzində İnsan Hüquqları Klubunun təşkilatçılığı ilə son günlərdə Azərbaycanda həyata keçirilmiş həbslər, polisin döyərək öldürməsi ehtimal olunan Elvin Əsgərov barədə və digər məsələlərə dair dəyirmi masa keçirdi.

Azərbaycan Liberal Gənclər Assosiasiyasının sədri Səbuhi Qafarov bildirdi ki, Azərbaycanda  son iki  həftədə insan hüquqlarının pozulmasına dair  ciddi hadisələr baş verib.
“Orta məktəblərdə hicabla qadağa qoyulması,  İslam Partiyası sədrinin və tərəfdarlarının həbsi, Milli Dövlətçilik Partiyasının sədri Nemət Pənahlının həbsi, vətəndaş Elvin Əsgərovun ölümü və digər məsələlər insan hüquqlarının pozulmasını sübut edən ciddi faktlardır”, – deyə Qafarov əlavə edib.
Televiziya və Alternativ Media İnkişaf Mərkəzinin rəhbəri  Rəsul Cəfərov isə bildirdi ki, son günlər Azərbaycanda baş verən hadisələrlə bağlı İnsan Hüquqları Klubu tərəfindən mövqe sənədi hazırlanaraq yerli və beynəlxalq ictimaiyyətin  diqqətinə çatdırılacaq. Cəfərov onu da əlavə etdi ki, hazırlanacaq  sənəd Avropa Şurası Parlament Assambleyasının qış sessiyası iştirakçılarına da təqdim ediləcək.
“Son günlərdə insan hüquqlarının pozulmasını təsdiq edən faktlardan biri bu gün bu tədbirdən yarım saat əvvəl hüquq müdafiə orqanları əməkdaşlarının RATİ-ni mühasirəyə almasıdır. Saat 10.30-dan ofisinin qabağında 30-a yaxın mülki və  polis geyimində şəxs dayanıb. Polislər ofisə də daxil olaraq hansı burada islamçıların və ya Nemət Pənahlının tərəfdarlarının tədbir keçirilib-keçirilmədiyi ilə  maraqlandılar. Bu isə hüquq müdafiə təşkilatına və hüquq müdafiəçilərinə açıq təzyiqdir“. Bunu isə çıxışında  Reportyorların Azadlıq və Təhlükəsizlik İnstitutunun sədri Emin Hüseynov bildirdi. O, ölkədə son vaxtlar insan haqlarının pozulması ilə bağlı çoxsaylı faktların qeydə alındığını və bütün bu faktların yuxarıda qeyd edilən sənədə əlavə olunacağını bildirdi.
Ekstremal Jurnalistika İnstitutunun sədri İdrak Abbasov isə çıxışında bir-neçə gün bundan əvvəl Beynəlxalq Avtovağzalın yanında qaçqınlara məxsus evlərin zorakılıqla sökülməsi, çoxsaylı insanın polis tərəfindən döyülərək həbs edilməsi haqqında danışdı. Habelə o, İslam Partiyası sədri və tərəfdarlarının, eyni zamanda Nemət Pənahlının sosial şəbəkələrdə və mətbuatda səsləndirdikləri fikirlərə görə həbs edildiyini istisna etmədi.