Iyun ayının 28-də Hüquq Maarifçiliyi Cəmiyyətinin Almaniyanın EED Təşkilatı və ABA CEELİ-nin Bakı Ofisi ilə birgə təşkil etdiyi “İnsan hüquqları sahəsində milli və beynəlxalq qanunvericilik” mövzusunda universitetlərarası yarışın final mərhələsi keçirilib.
Finalda üç komanda – Dövlət İdarəçilik Akademiyasının "İddia", Bakı Dövlət Universitetinin "Favorit" və Polis Akademiyasının "Polis Akademiyası" komandaları birincilik uğrunda mübarizə aparıblar. Final qarşılaşmasında komandaların insan hüquqlarının müdafiəsinin beynəlxalq mexanizmləri, xüsusilə də Avropa İnsan Hüquqları Məhkəməsi sahəsində biliklərini ölkənin tanınmış hüquqşünaslarından ibarət münsiflər heyəti qiymətləndirib.
Sosial səhnəciklər, məhkəmə çıxışları, sual-cavab və ekstremal vəziyyətdən çıxış yolu mərhələlərindən ibarət olan final turunda Bakı Dövlət Universitetinin “Favorit” komandası qalib gəlib. Bu komanda iyul ayında Türkiyəyə bir neçə günlük səfər imkanı əldə edib. Səfər zamanı onlar həmin ölkənin nüfuzlu universitetlərində, QHT-lərdə və vəkil bürolarında olacaqlar.
Qeyd edək ki, tədbirə Reportyorların Azadlıq və Təhlükəsizlik İnstitutu (RATİ) informasiya dəstəyi verib.
Xatırladaq ki, yarışın seçmə turu mayın 22-də keçirilib və 5 komanda iştirak edib.
Foto: http://www.irfs.az/component/option,com_datsogallery/Itemid,30/func,viewcategory/catid,536/lang,az/