Bu gün (26 oktyabr) Səbail rayon Məhkəməsində hakim Elnur Həsənovun sədrliyi ilə Hüquq Maarifçiliyi Cəmiyyətinin sədri İntiqam Əliyevin Azərbaycan Respublikasının Avropa İnsan Haqları Məhkəməsindəki səlahiyyətli nümayəndəsi Çingiz Əsgərova qarşı informasiya sorğusuna cavab verilməməsinin qanunsuz hesab olunmasına dair qaldırdığı iddia üzrə məhkəmə hazırlıq iclası keçirildi.
Prosesdə Hüquq Maarifçiliyi Cəmiyyətinin nümayəndəsi Nurlana Əliyeva iştirak edirdi. Cavabdeh tərəfdən isə nümayəndə iştirak etmirdi.
Hakim mahiyyəti üzrə baxış üçün məhkəmə prosesini 6 noyabr saat 16:00-a təyin etdi.
Xatırladaq ki, 29 iyul 2009-cu il tarixində Hüquq Maarifçiliyi Cəmiyyətinin sədri İntiqam Əliyev informasiya sorğusu ilə Avropa İnsan Hüquqları Məhkəməsi yanında Azərbaycanın səlahiyyətli nümayəndəsi Çingiz Əsgərova müraciət etmiş, lakin sorğuya cavab almamışdır. İddiaçı bunu məlumat almaq azadlığının pozulması hesab edərək, informasiya sorğusuna cavab verilməməsinin qanunsuz sayılmasına dair şikayətlə Səbail rayon məhkəməsinə müraciət edib.