Bu gün (17 aprel) Yasamal rayon Məhkəməsində hakim Anar Rzayevin sədrliyi ilə jurnalist Natiq Güləhmədoğlunun (Ədilov) “Lider” televiziyası və “Afra otelə” qarşı qaldırdığı iddia üzrə məhkəmə iclası davam edib.
İ.Əliyevin sözlərinə görə, prosesdə özü, Natiq Ədilov, “Afra otel”-in nümayəndələri iştirak etsə də, “Lider TV”-nin nümayəndəsi iştirak etməyiblər. Prosesdə vəkil İ.Əliyev kameraların jurnalistlərin yaşadıqları otağa kim tərəfindən yerləşdirilməsinə dair sorğuya cavab verilməsinin “Afra otel”-in rəhbərliyinin üzərinə vəzifə kimi qoyulması barədə vəsatət qaldırıb. Hakim bu vəsatəti təmin edib və növbəti prosesi 1 may saat 15:00-a təyin edib.
Xatırladaq ki, jurnalistlər 15 aprel 2011-ci il tarixində Qan Turalı və Natiq Ədilovun Oğuz rayonunda olan təlim zamanı yaşadıqları otel otağında gizli yerləşdirilmiş kamera vasitəsilə çəkilmiş video görüntüləri “Lider” Televiziyasında yayımlanmışdı və Natiq Ədilov şəxsi həyatına hörmət hüququnun tanınması, cavabdehin üzərinə şikayətçidən üzr istənilməsi vəzifəsinin qoyulması, şəxsi həyatın toxunulmazlığı, şərəf və ləyaqətin müdafiəsinə dair iddiası ilə cavabdehlərin hər birindən onlara vurulan mənəvi ziyana görə 100 000 AZN təzminat ödənilməsi barədə tələblə Yasamal rayon Məhkəməsinə müraciət edib. Məhkəmə 9 sentyabr 2011-ci ildə adıçəkilən iş üzrə icraatın dayandırılaraq işin ekspertizaya göndərilməsi barədə qərar qəbul edərək, prosesi qeyri-müəyyən vaxta qədər təxirə saldığını elan etmişdi.