Dünən Mətbuat Şurasının ofisində ABŞ səfiri Enn Ders ilə qurumun İdarə Heyətinin üzvləri arasında görüş keçirilib.
2 saatlıq görüş zamanı tərəflər Azərbaycanda söz və mətbuat azadlığının durumu, medianın problemləri və onların həlli yolları ətrafında söhbət aparıblar. MŞ-dan APA-ya bildirilib ki, qurumun sədri Əflatun Amaşov bu istiqamətdə indiyədək görülən işlər haqqında danışıb. Diplomat xüsusi ilə “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayev və “Azadlıq” qəzetinin baş redaktoru Qənimət Zahidin həbsini misal çəkərək Azərbaycanda söz və mətbuat azadlığı sahəsindəki vəziyyətin onu ciddi narahat etdiyini deyib. Qurumun sədri Ə.Amaşov isə əlavə edib ki, “biz də media təmsilçilərinin sözə görə həbsinin tərəfdarı deyilik”.