MÜŞFİQ HÜSEYNOVUN SƏHHƏTİ DAHA DA KƏSKİNLƏŞİB

noyabr 2nd, 2009
Ədliyyə Nazirliyinin İxtisaslaşdırılmış Müalicə Müəssisəsində müalicə olunan “Bizim Yol” qəzetinin əməkdaşı Müşfiq Hüseynovun səhhəti daha da kəskinləşib.

Bu barədə Reportyorların Azadlıq və Təhlükəsizlik İnstitutuna dünən (01 noyabr) onunla görüşən qardaşı Sərvər Hüseynov məlumat verib. Onun sözlərinə görə, 3 saylı cəza çəkmə müəssisəsində onu səbəbsiz olaraq süni şəkildə gözləməyə məcbur ediblər və görüşə gələnlər yağışlı, soyuq və açıq havada gözləməli olublar. “Havalar soyuyandan sonra Müşfiqin xəstəliyi daha da kəskinləşib. Xəstəxanada istilik sistemi hələ işə salınmadığından soyuq olur. Öz vəziyyətinə gəldikdə özünü çox zəif  və halsız hiss edir, temperaturu yüksək olur. Danışanda fasilələrlə danışır, tənginəfəslik özünü büruzə verir. Xəstəlik əvvəl sağ tərəfdə olub, indi isə sol tərəfdə də baş qaldırıb və “sol ağciyərin infiltrativ ocaqlı vərəm dağılma mərhələsində”dir. Qaraciyərində də ciddi problemlər yaranıb və kəskin ağrılar olur” – deyən S.Hüseynov bildirdi ki, Müşfiq Hüseynov qaraciyəri ilə əlaqədar olaraq da müalicə almağa başlayıb.

Xatırladaq ki, M.Hüseynov 2007-ci il iyulun 24-də həbs olunub. Ona qarşı CM-nin 311-ci maddəsi (rüşvət alma ) ilə ittiham irəli sürülüb və 2008-ci ilin yanvar ayında o 6 il müddətinə azadlıqdan məhrum olunub. Bakı Apellyasiya Məhkəməsi isə M.Hüseynovun cəzasını 1 il azaldıb.