“Ölkə” qəzetinin əməkdaşı Nicat Dağlar peşə fəaliyyəti zamanı təzyiqə məruz qalıb. Bu barədə bu gün (30 noyabr) Reportyorların Azadlıq və Təhlükəsizlik İnstitutuna (RATİ) Nicat Dağların özü məlumat verib.
N. Dağlar bildirdi ki, o ölkəyə gətirilən kənd təsərrüfatı texnikası barədə araşdırma aparır. Araşdırma çərçivəsində rayonların kənd təsərrüfat texnikası ilə necə təmin edilməsi və onların ümumi sayı barədə məlumatlar toplayır. Bu məqsədlə o bu gün “Aqrolizinq” Səhmdar Cəmiyyətinin Bakıxanov qəsəbəsində yerləşən baş idarəsində olub. Burda isə jurnalist təzyiqlə üzləşdiyini bildirir.
“Mən bir jurnalist kimi öz peşə fəaliyyətimi yerinə yetirdiyimi və sorğuma cavab məqsədilə idarəyə gəldiyimi bildirdim. Lakin əməkdaşlar və idarənin mühafizə xidməti məni itələyərək, ofisdən çıxardılar”, – deyən jurnalist məsələ barədə Kənd Təsərrüfatı naziri İsmət Abbasova müraciət edəcəyini bildirdi.
Qeyd edək ki, “Ölkə” qəzeti 2008-ci ilin fevral ayında fəaliyyətə başlayıb və həftədə bir dəfə dərc olunur.