Bu gün (24 may) İnsan Hüquqları Evində “Azadlıq” qəzetinin baş redaktoru Qənmət Zahidin bir qrup jurnalistlə birlikdə təsis etdiyi “Yeni Jurnalistika Hərəkatı” təşkilatının təqdimat mərasimi keçirilib.
Tədbirdə çıxış edən Qənimət Zahid bildirib ki, təşkilatın yaranması söz azadlığının təhlükəli vəziyyətdə olması zərurətindən irəli gəlib. “Azərbaycanda çox sayda jurnalist təşkilatı olsa da, onların əksəriyyəti fəaliyyətsizdir” – deyən Q.Zahid əlavə etdi ki, yaranmış təşkilata kömək edilməsi üçün bütün jurnalist təşkilatlarına müraciət edəcəklər. Əsasən gənc jurnalistlərin irəli çəkilməsi, onların maarifləndirilməsi işi ilə məşğul olacaqlarını deyən Q.Zahid təşkilatın ilk koordinatorunun “Azadlıq” qəzetinin əməkdaşı Ramin Deko olacağını dedi.
Tədbirdə çıxış edən digər media qurumlarının rəhbərləri və jurnalistlər də yeni yaranmış təşkilata dəstək verəcəklərini bildirdilər.