Azərbaycanda populyar olan azeriblog.com saytı oktyabrın 20-dən səbəbi izah edilmədən bağlanılıb.
“15 min bloqçudan 1 il ərzində cəmi 100 nəfəri pul ödəmişdi. Bu da 1000 manata qədər pul elədi. Ancaq mən ayda 200 dollara yaxın pul ödəyirdim. Serverin pulunu ödəyə bilmədik və nəticədə serveri bağladılar”, – deyə qeyd edəm Fərhad Əsgərzadə deyir ki, saytın xərci borcunu ödəmədiyindən qərara alıb ki, azeriblog.com-u satışa çıxarsın.
“Azərbaycandan bir neçə şirkətlə danışdım, ancaq onlardan da bir xəbər çıxmadı. Sata bilməsəm də, özüm 1 həftəyə, ya bir aya axır ki, saytın fəaliyyətini bərpa edəcəm”, – deyə vurğulayan Fərhad Əsgərzadə söz verib ki, hətta saytın gələcəkdə fəaliyyəti bərpa olunmasa belə, o, imkan yaradacaq ki, bloq yazarları öz yazılarını Azeribloq.com-dakı bloqlarından götürə bilsinlər.
Azərbaycan İnternet Forumun prezidenti Osman Gündüz isə deyib ki, azeriblog.com-da 15 mindən artıq bloq yazarının toplaşması ondan xəbər verir ki, həmin sayt tanınmış internet resurslarındandır və belə bir gərəkli internet resursun öz istifadəçilərinə qarşı sayğısız davranması ciddi məsələdir: “Fəaliyyətini dayandırmaq ərəfəsində istifadəçiləri mütləq xəbərdarlıq etməli idi. Könüllü xidmət göstərənlərlə bağlı bir qədər yumşaq yanaşma ola bilər, onlara etik qaydalara uyğun olaraq xəbərdarlıq oluna bilərdi”, – deyə qeyd edən Osman Gündüzün sözlərinə görə, azeriblog.com-un sahibi xarici vətəndaş olduğuna görə, saytın pullu istifadəçiləri məsələni hətta beynəlxalq məhkəməyə də çıxara bilərlər.