Yasamal rayon məhkəmə icraçıları mərhum jurnalist, “Tolışi-Sədo” (“Talışın Səsi”) qəzetinin baş redaktoru Novruzəli Məmmədovun əmlakının müsadirə olunması barədə 3 il əvvəlki çıxarılmış hökmün icrasına başlayıblar.
Vəkilin sözlərinə görə, bir həftə əvvəl Yasamal Rayon Məhkəməsindən həmin əşyaların təhvil verilməsi haqda xəbərdarlıq edilib, lakin vaxtilə ailə məhkəmə orqanlarına müsadirəyə şamil edilən əşyaları götürməyi təklif edib, lakin onlar bunu etməyiblər:
“Yasamal Rayon Məhkəməsindən xəbərdarlıq edildi ki, 2008-ci il Ağır Cinayətlərə Dair İşlər üzrə Məhkəmənin hökmündə göstərildiyi, ümumi dəyəri 600 manat hesablanan 1 kompüter stolu, 1 stol, 5 stul, İranda toxunmuş 1 xalça, 1 televizor və 1 fotoaparat dövlətə təhvil verilməlidir. Əks təqdirdə Novruzəli Məmmədovun həyat yoldaşı axtarışa veriləcək. Bu xəbərdarlıqdan sonra onun Moskvada müalicə olunan yoldaşı Məryəm xanım avadanlıqları tapıb təhvil verməyimizi istədi. Sadalanan əşyalar təhvil verilib, amma stol, 1 stul, televizor və fotoaparatı tapa bilmədik”.
Xatırladaq ki, Novruzəli Məmmədov 2007-ci ildə qapalı keçirilən məhkəmə prosesində Azərbaycan Respublikası Cinayət Məcəlləsinin 274-cü (“Dövlətə Xəyanət”) maddəsi ilə 10 il müddətinə azadlıqdan məhrum edilsə də, milliyyəti talış olan baş redaktor özünü təqsirli bilməyərək, etnik-siyasi motivlərlə və ifadə azadlığına görə həbs olunduğunu iddia edirdi.
Qeyd edək ki, Novruzəli Məmmədov 17 avqust 2009-cu il tarixdə Ədliyyə Nazirliyi Penitensiar Xidmətinin Mərkəzi Xəstəxanasında 68 yaşında müəmmalı şəkildə vəfat edib. Mərhumun ailəsi bununla bağlı Nəsimi Rayon Məhkəməsində iddia qaldırıb və məhkəmə 27 yanvar 2010-cu il tarixdə tarixdə iddianı təmin etməyib. Həmin ilin 1 iyununda Bakı Apellyasiya Məhkəməsi ilkin məhkəmənin çıxardığı qərarı qüvvədə saxlayıb. 24 dekabr 2010-cu ildə Ali Məhkəmə işin yenidən apellyasiya məhkəməsinə qaytarılması barədə qərar verib. Rəsmi qurumlar onun beyin qansızması nəticəsində dünyasını dəyişdiyini desələr də, Novruzəli Məmmədovun Hüquqlarının Müdafiə Komitəsi və ailə üzvləri baş redaktora lazımi tibbi yardım göstərilməməyi və düzgün müalicə olunmamağı nəticəsində öldüyünü bildirirlər.