“İlkin məhkəmə hökmünün surəti hələ ki, bizə verilməyib. İttiham aktı isə Aydın Canıyevə yalnız məhkəmə hökmü oxunduqdan sonra təqdim olunub. Bunu qanun pozuntusu kimi qiymətləndirirəm. Həmçinin, Lənkəran Rayon Məhkəməsinin icraatında jurnalistin başqa bir işi də var. Qafqaz Müsəlmanları İdarəsi sədrinin Lənkəran nümayəndəsi Qəni Axundzadə jurnalisti “Xural” qəzetində dərc olunmuş yazısına görə məhkəməyə verib. Qəni Axundzadə təhqir olunduğunu iddia edir. Aydın Canıyevin həmin yazısı Milli Elmlər Akademiyasının Dilçilik İnstitutuna linqvistik ekspertizaya göndərilib. Proses ekspert rəyindən sonra davam edəcək”.
Xatırladaq ki, Aydın Canıyev sentyabrın 7-də Lənkəranın Səpnəkəran kənd dindarlarının şikayəti əsasında saxlanılıb. Jurnalist kənd məscidinin pəncərələrini qırmaqda və dindarları təhqir etməkdə ittiham olunub və ona 12 sutka inzibati həbs cəzası verilib. Daha sonra isə ona qarşı Cinayət Məcəlləsinin 221.2.2 (xuliqanlıq ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə törədildikdə) maddəsi üzrə cinayət işinə başlanıb və inzibati həbs cəzasının vaxtı bitəndən sonra, sentyabrın 20-də Lənkəran şəhər Məhkəməsi onun barəsində 2 ay müddətinə həbs qətimkan tədbirinin seçilməsinə dair qərar çıxarıb. Noyabrın 21-də isə
jurnalist barədə 3 il müddətinə azadlıqdan məhrum etmə qərarı çıxarılıb.