BAKI APELLYASİYA MƏHKƏMƏSİ “QADAĞALARI” ƏSASLANDIRMAĞA ÇALIŞIB

yanvar 13th, 2009
RATİ-nin müraciəti (http://www.irfs.az/content/view/1573/28/lang,az/) əsasında Azərbaycan Respublikası Məhkəmə-Hüquq Şurası tərəfindən qəbul edilmiş  və baxılması üçün Bakı Apellyasiya Məhkəməsinə göndərilmiş qərara baxılıb.

Apellyasiya Məhkəməsindən bu gün (13 yanvar) RATİ-yə daxil olan məktubda qeyd edilir ki,  Apellyasiya Məhkəməsində keçirilən açıq məhkəmə prosesləri zamanı  RATİ əməkdaşlarının foto və video çəkilişlər aparmasına  icazənin  verilməməyi Azərbaycan Respublikası Cinayət Prosessual Məcəlləsinin 310.2.4-cü maddəsinə uyğundur: “Məhkəmə iclasında foto, kino, audio, video, kompyuter və digər yazan texniki vasitələrdən istifadə edilməsinə yalnız məhkəmə prosesinə sədrlik edən hakimin  icazəsi ilə yol verilə bilər. Kino və foto çəkilişə, video yazıya, canlı yayımla radio və teletranslyasiyaya işdə iştirak edən tərəflərin də razılığı nəzərə alınmaqla icazə verilə bilər”.
Belə ki, RATİ tərəfindən  Məhkəmə Hüquq Şurasına ünvanlanan məktub və ona əlavə olunan  qoşma yalnız Bakı  Apellyasiya Məhkəməsinə göndərilib. Halbuki məktuba əlavə olunan qoşma  Bakı şəhər Xətai rayon Məhkəməsi, Bakı şəhər Nəsimi rayon Məhkəməsi və Bakı şəhər Yasamal rayon Məhkəməsinə də göndərilməli idi.  Çünki adı çəkilən bu məhkəmələrdə də RATİ əməkdaşları mütəmadi olaraq problemlərlə üzləşirlər.
Qeyd edək ki, dəfələrlə ayrı-ayrı hakimlər tərəfindən  RATİ əməkdaşlarına açıq  məhkəmə proseslərində  monitorinq aparmaq, foto və video çəkilişlər aparmaq isə əsasız olaraq qadağan edilib.  Bu səbəbdən də RATİ Azərbaycan Respublikası Məhkəmə-Hüquq Şurasına müraciət etmişdi.