Bu gün(13 iyul) Binəqədi rayon Məhkəməsində hakim Hüseyn Səfərovun sədrliyi ilə Vəkillər Kollegiyası Rəyasət Heyətinin Osman Kazımovun Vəkillər Kollegiyasından xaric edilməsi, bu iddiaya qarşı Osman Kazımovun verdiyi qarşılıqlı iddia və müstəqil tələb irəli sürən 3-cü şəxsin iddiası əsasında məhkəmə prosesi keçirildi.
Vəkillər Kollegiyası Osman Kazımovun vəkillik fəaliyyətinin dayandırılması və qurumun üzvlüyündən çıxarılması üçün məhkəməyə müraciət olunması qərarını ləğv edib və məhkəməyə verdiyi iddiasını geri götürüb. Kollegiya Osman Kazımova töhmət verilməsi barədə qərar qəbul edib.
Buna əsasən məhkəmədə Osman Kazımov da verdiyi qarşılıqlı iddianı geri götürüb.
Hakim Hüseyn Səfərov isə iş üzrə icraata xitam verilməsi barədə qərar qəbul edib.
Xatırladaq ki, Vəkillər Kollegiyası Rəyasət Heyətinin fevralın 4-də keçirilən iclasında Osman Kazımovun vəkillik fəaliyyətinin dayandırılması və qurum üzvlüyündən çıxarılması üçün məhkəməyə müraciət olunması barədə qərar qəbul etmişdi. Rəyasət Heyəti bu qərarı baş prokurorun birinci müavini Rüstəm Usubovun təqdimatı əsasında çıxarmışdı. Prokurorluq Osman Kazımovu Cinayət Prosessual Məcəlləsini və “Vəkillik fəaliyyəti haqqında” qanunu pozmaqda ittiham edirdi.