Fevralın 14-də RATİ-nin ofisində ötən şənbə Prezident Administrasiyasının qarşısında keçirilən etiraz aksiyasından reportaj hazırlayarkən mülki geyimli şəxslər tərəfindən fiziki təzyiqə məruz qalan “Bizim Yol” qəzetinin müxbiri Ramid İbrahimovun mətbuat konfransı keçirib.
Jurnalistin sözlərinə görə “Muray” MMC-nin aldatdığı adamların Prezident Administrasiyasının qarşısında etiraz aksiyasından şəkillər çəkərkən Xüsusi Dövlət Mühafizə İdarəsinin əməkdaşları tərəfindən ona fiziki təzyiq edilib. Polkovnik rütbəli mühafizə xidməti zabiti jurnalistin telefonun, vəsiqəsini ondan alıb və təpiklə göbəyindən aşağı zərbə endirib. Jurnalistin sözlərinə görə həmin polkovnik bir qadını döyürmüş. Baş verənlərlə bağlı polisə müraciət etdiyini və tibbi ekspertizadan keçdiyini bildirən Ramid İbrahimov onu döyən şəxsin cəzalandırılması üçün bütün hüquqi addımları atacağını bildirdi.
Öz növbəsində “Bizim Yol” qəzetinin baş redaktoru Bahəddin Həziyev bildirdi ki, hər gün şifahi şəkildə olsa belə qəzetinin jurnalistlərinə qarşı hədələr olur. Baş redaktorun sözlərinə görə İbrahimovun bir müddət əvvəl Füzuli küçəsində evlərin söküldüyü zaman da döyülmüşdü. Jurnalistin döyülməsini kəskin pisləyən baş redaktor hadisə ilə bağlı beynəlxalq təşkilatlara, hüquq-mühafizə orqanlarına, məhkəməyə müraciət edəcəyini də deyib.
“Bizim Yol” qəzeti 2003-cü ildən çıxır, hazırda gündəlik Azərbaycan dilində nəşr olunur.