Bu gün İşgəncələr Əleyhinə Azərbaycan Komitəsinin sədri Elçin Behbudov 13 saylı Cəzaçəkmə Müəssisəsində saxlanılan “Gündəlik Azərbaycan” və “Realniy Azerbaydjan” qəzetlərinin baş redaktoru Eynulla Fətullayevlə görüşüb.
Bu haqda RATİ-yə məlumat verən komitə sədri Elçin Behbudov Fətullayevin səhhətinin normal olduğunu söyləyib. “Lakin onun cəzaçəkmə müəssisəsinin rəhbərliyi ilə problemləri var. O bu problemlərin nədən ibarət olduğunu mətbuatda işıqlanmasını istəmir. Müəssisə rəhbərliyi ilə görüş zamanı bu problem öz həllini artıq tapıb”, – deyə Behbudov əlavə edib.
Behbudovun sözlərinə görə, baş redaktor “Hyuman Rayts Vatç” təşkilatı tərəfindən fədakar jurnalist mükafatına layiq görüldüyünə görə çox sevinir və onu dəstəkləyən bütün qurum və təşkilatlara o cümlədən jurnalist dostlarına öz təşəkkürünü bildirir.