Məhkəmə iclası təsisçinin hakimə sənədlərin təqdim edilməsi ilə açıldı. Redaksiyanın əmr kitabçası və baş redaktorun işə qəbul olması haqda sərəncamının surəti məhkəməyə təqdim olundu. Hakim və vəkillər kitaba baxış keçirdikdən sonra Vüqar Qurdqanlı cavabdeh qismində işə cəlb olundu.
Təsisçi hakimə və vəkillərə müraciət edərək məhkəmənin sülh yolu, yəni təkzibin verilməsi təklifi ilə çıxış etsə də, təklif qarşı tərəfin vəkilləri tərəfindən rədd olundu və məhkəmə iclası tərəflərin ifadələri ilə davam etdi.
Növbəti məhkəmə prosesi aprelin 7-i, saat 16:00-a təyin edildi.
Xatırladaq ki, “ANS Press” Nəşriyyat evi “Azadlıq Fədailəri” qəzetini və həmin qəzetin Allahverdi Nəbi adlı əməkdaşını qəzetin 28.11-01.12.2008 tarixli sayında dərc edilmiş “ANS-in pornoqrafiyası” və “ANS hər zaman, hər yerdədir- tərbiyəsizliyi ilə” başlıqlı yazılarına görə məhkəməyə verib. İddiaçı tərəf qəzetdə gedən həmin yazıların həqiqətə uyğun olmadığını, yalan, alçaldıcı və təhqiredici məlumatlar olduğunu hesab edir.”ANS Press” Nəşriyyat Evi məhkəmədən qəzetin təkzib verməsi, qəzetdən 50000AZN, qəzetin əməkdaşı Allahverdi Nəbidən isə 10000AZN-in tutulması tələbi ilə xahiş edib.