Bu gün (15 dekabr) Yasamal rayon Məhkəməsində hakim Elçin Qurbanovun sədrliyi ilə Yasamal rayon icra hakimiyyəti başçısı İbrahim Mehdiyevin vətəndaş Yaqub Muradzadəyə qarşı xüsusi ittiham qaydasında qaldırdığı iddia üzrə məhkəmənin qərarı elan edilib.
Hakim E.Qurbanov vətəndaş Y.Muradzadənin Cinayət Məcəlləsinin (CM) 147.1 maddəsi (Böhtan) 500 manat məbləğində, CM-nin 147. 2 maddəsi (Ağır və ya xüsusilə ağır cinayətdə ittiham etməklə böhtan atma) ilə bəraət verilməsi və 148-ci maddəsi (Təhqir) ilə 1000 manat məbləğində cərimələnməsi barədə qərar verdi.
Y. Muradzadənin vəkili Əlibaba Rzayev Reportyorların Azadlıq və Təhlükəsizlik İnstitutuna (RATİ) hakimin bu qərarından apellyasiya şikayəti verəcəklərini bildirdi.
Xatırladaq ki, Mehdiyev Yaqub Muradzadənin onun barəsində müxtəlif dövlət qurumlarına şikayət məktubları yazaraq, məktublarda onu təhqir etdiyini və böhtana məruz qoyduğunu iddia edərək Cinayət Məcəlləsinin 147 (böhtan) və 148-ci (təhqir) maddələri ilə xüsusi ittiham qaydasında məhkəməyə şikayət edib.
Qeyd edək ki, Yaqub Muradzadə 2004-2006-cı ildə nəşr olunan və hazırda fəaliyyət göstərməyən “Yeni Qəzet”in redaktoru olduğunu bildirir.