JURNALİSTLƏR ÜÇÜN MÜSABİQƏ KEÇİRİLİR

fevral 5th, 2008
Bu gün Beynəlxalq Mətbuat Mərkəzində Media Hüquqları Mərkəzi jurnalistlər arasında təşkil etdiyi “İnsan Hüquqlarının Vəziyyətinə Dair Jurnalist Tədqiqatları” mövzusunda elan etdiyi müsabiqə ilə əlaqədar mətbuat konfransı keçirib.

Tədbiri giriş sözü ilə açan Media Hüquqları Mərkəzinin rəhbəri Mətanət Müslümqızı bildirdi ki, üç ay ərzində, yəni fevral ayının 15-dən may ayının 15-dək davam edəcək müsabiqədə televiziya, radio, agentlik və yazılı mətbuat nümayəndələri iştirak edə bilərlər. Müsabiqə iştirakçılarının təqdim etdiyi yazıları 7 nəfərdən ibarət münsiflər heyəti qiymətləndirəcək. Qiymətləndirmə 10 ballıq sistem üzrə aparılacaq. Qaliblər üçün iki kateqoriyada mükafatlar təsis edilib. Birinci kateqoriyada beş yer yazıların keyfiyyətinə görə, ikinci kateqoriyada iki yer kəmiyyətə görə mükafatlandırılacaq.