"Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayevin atası Emin Fətullayev oğluna qarşı münasibətdən narahat olduğu üçün Penitensiar Xidmətə müraciət edib.
Bu məlumatı RATİ-yə Emin Fətullayev verib: "Mən bu gün Ədliyyə Nazirliyi Penitensiar Xidmətində olmuşam. Və rəhbərliyə müraciət edərək, cəzaçəkmə müəssisəsində Eynullaya qarşı olan münasibətə etirazımı bildirmişəm. Cəzaçəkmə müəssisəsində müxtəlif xarakterli insanlar olduğu üçün müəssisə rəhbərliyi bunu nəzərə alaraq onlara xarakterlərinə uyğun münasibət göstərməyi bacarmalıdır. Mənə bildirdilər ki, məsələ ilə maraqlanarıq".
Qeyd edək ki, Eynulla Fətullayev daxili nizam-intizam qaydalarını pozduğu üçün 10 günlük "karser"-ə salınmış, eyni zamanda ona töhmət verilmişdi. Baş redaktorun atası və vəkili bunları ədalətsiz münasibət kimi qiymətləndirir.