“Dünən (04 avqust) saat 17:00 radələrində millət vəkili İqbal Ağazadə “İdeal” qəzetinə hücum çəkib”.
Bu məlumatı “İdeal” qəzetinin baş redaktoru Nazim Quliyev Reportyorların Azadlıq və Təhlükəsizlik İnstitutuna (RATİ) verib.
“İqbal Ağazadə öz yaxın qohumu Qafqaz adlı və daha beş nəfər tanımadığım şəxslə qəzet redaksiyasına daxil olaraq məni təhqir etdi. İqbal Ağazadə otağımda olan masaya təpik vurdu və bu zaman masanı üzərindəki kompüter və digər avadanlıqlar yerə düşərək sındı”, – deyə qeyd edən N. Quliyev onu da bildirib ki, hadisə zamanı redaksiyanı mühafizəçisinə qarşı da zor tətbiq olunub.
Baş redaktor hadisə barədə Nəsimi rayon Polis İdarəsinin 22-ci Polis Bölməsi, habelə Bakı şəhər Baş Polis İdarəsinə məlumat verdiklərini və baş verənlərlə bağlı artıq cinayət işinin açıldığını da bildirdi.
Bu xəbərə münasibət bildirən İ. Ağazadə belə bir hadisənin ümumiyyətlə baş vermədiyini və N. Quliyevin ona şər atdığını dedi: “Bu xəbər mənə qarşı təxribatdır. 2006-cı ildən bəri mənim haqqımda müxtəlif qəzetlərdə yazılar yazılıb, amma mən indiyə qədər heç bir mətbuat orqanına narazılığımı bildirməmişəm ”.