AVROPA ŞURASI XARİCİ RADİOSTANSİYALARLA BAĞLI AZƏRBAYCAN HÖKUMƏTİ İLƏ DANIŞIQLAR APARACAQ

dekabr 2nd, 2008
Bu gün (02 dekabr) Avropa Şurasının (AŞ) baş katibi Terri Devis Bakıda mətbuat konfransı keçirib.

O bildirib ki, AŞ «Azadlıq», «Amerikanın səsi» və BBC radiostansiyalarının proqramlarının yerli tezliklərdə yayımının davam etdirilməsi ilə əlaqədar Azərbaycan hökuməti ilə danışıqlar aparmaq niyyətindədir:
«Mən radiostansiyaların yayımının dayandırılmasının tamamilə əleyhinəyəm. Radiostansiyaların mövqeyi hökumətin mövqeyi ilə üst-üstə düşməyə bilər. Amma bu o demək deyil ki, onların yayımı dayandırılmalıdır» – deyə, Devis bildirib.
«Turan»ın məlumatına görə, AŞ baş katibi etiraf edib ki, o özü bəzən BBC-nin verilişlərindən narazı olub. «Lakin bu o demək deyil ki, mən nə vaxtsa bu radiostansiyanın bağlanmasını istəmişəm». Baş katib əlavə edib ki, Azərbaycan hökuməti ilə bu məsələ ilə bağlı danışıqlar aparacaq.