Bir qrup jurnalistin – Rauf Abbasov, Azər Abbasov, Etibar Ağayev, Elşad Məmmədli, Zabil Müqabiloğlu, Qənimət Zahidov, Şahvələd Çobanoğlu və Mehman Əliyevin 12 iyun 2007-ci il tarixdə mediaya basqılara son qoyulması tələbi ilə Sabir bağında keçirmək istədikləri piket zamanı polislərin fiziki hücumuna məruz qalması ilə bağlı Avropa Məhkəməsinə göndərdikləri şikayət ilə əlaqədar Avropa məhkəməsi prosedurlara başlayıb. Bu barədə bu gün (05 may) Reportyorların Azadlıq və Təhlükəsizlik İnstitutuna (RATİ) Media Hüququ İnstitutunun direktoru Rəşid Hacılı məlumat verib.
“Artıq bizə göndərilən sualları cavablayıb Avropa Məhkəməsinə göndərmişik. Məhkəmədə hansısa yeni suallar çıxsa, onlar da məhkəməyə veriləcək. Bu halda da rəyimiz hökumətə göndəriləcək. O biri tərəfdən, rəy olmasa qərar veriləcək. İşə baxılması üçün konkret vaxt məsələsi qoyulmayıb. İşə prioritet qaydada baxılır, proses daha sürətli aparılacaq,”- deyə Hacılı əlavə edib.
Xatırladaq ki, bir qrup jurnalist – Rauf Arifoğlu, Azər Ayxan, Etibar Ağayev, Elşad Məmmədli, Zabil Müqabiloğlu, Qənimət Zahid, Şahvələd Çobanoğlu və Mehman Əliyev 2007-ci il iyunun 12-də Bakının Sabir bağında mediaya basqılara etiraz olaraq aksiya keçirməyə cəhd etsələr də, Səbail Rayon Polis İdarəsi əməkdaşlarının fiziki basqıları ilə üzləşiblər. Qənimət Zahid, Rauf Arifoğlu, Şahvələd Çobanoğlu, Zabil Müqabiloğlu zor tətbiq olunmaqla həbs edilib. Jurnalistlər məhkəməyə üz tutaraq polisin piketə müdaxiləsini qanunsuz hesab edən, jurnalistlərə zor tətbiq edən polis əməkdaşlarına cinayət işi başlanmasını, habelə cavabdehin hüquqları pozulan jurnalistlərə 10 min manat təzminat ödəməsini nəzərdə tutan qətnamə çıxarılmasını istəmişdilər. Səbail Rayon Məhkəməsi 2007-cı il iyulun 20-də iddianı icraata götürməkdən imtina edib. Həmin il sentyabrın 18-də Bakı Apellyasiya Məhkəməsi, 2008-ci il yanvarın 10-da isə Ali Məhkəmə jurnalistlərin şikayətini rədd edib. Bu qərardan da Avropa İnsan Haqları Məhkəməsinə şikayət göndərilib