Mayın 5-də Gəncə şəhər Nizami rayon Məhkəməsində hakim Emin Axundovun sədrliyi ilə orduda xidmətdən yayınmaqda ittiham olunan gənc fəal Bəxtiyar Hacıyevin işi üzrə təyin olunan məhkəmə prosesi keçirildi. Bu barədə Reportyorların Azadlıq və Təhlükəsizlik İnstitutuna (RATİ)Bəxtiyar Hacıyevin vəkili Elçin Namazov məlumat verib.
Gəncə Müvəqqəti Saxlanma Məntəqəsinin rəis müavini Nizami Mehdiyev və Nizami rayon Polis İdarəsinin əməkdaşı Vüsal Şəbəndiyev şahid qismində prosesə cəlb edilərək ifadə veriblər.
Gənc fəal Bəxtiyar Hacıyev çıxışında barəsində qaldırılmış cinayət işinin ədalətli araşdırılmadığını deyərək, məhkəmə istintaqında iştirakdan imtina etdiyini məhkəməyə bildirib və şahidlərin ifadəsini dinləməkdən imtina etdiyini qeyd edib.
Müdafiə tərəfin vəkilləri çıxış etmək istədiklərini bildiriblər, lakin hakim Emin Axundov prosesi 10 may saat 10:00-a təyin edib.
Xatırladaq ki, Hacıyev barəsində cinayət işi yanvarın sonlarında açılıb. Elə həmin vaxt ondan yaşadığı yeri tərk etməmək haqqında iltizamnamə alınıb, fevralın əvvəllərində isə bu qətimkan tədbiri “polisin nəzarətində olma” ilə əvəz olunub.
Martın 4-də Hacıyev bir ay müddətinə həbs edilib. Hüquq mühafizə təşkilatları hesab edirlər ki, 2010-cu il parlament seçkilərində deputatlığa namizəd olmuş gənc fəal facebook-da gənclərin 11 mart “Böyük xalq günü” etiraz aksiyasını təyin edən qrupun üzvü olduğuna görə həbs olunub.