Avropa İnsan Haqları Məhkəməsi 2007-ci il noyabrın 22-də Məhkəməsi xuliqanlıqda şübhəli sayılaraq haqqında 2 ay müddətində həbs qətimkan tədbiri seçilmiş “Azadlıq” qəzetinin baş redaktoru Qənimət Zahidin şikayətini araşdırmağa başlayıb. Bu barədə RATİ-yə Media Hüququ İnstitutunun vəkili Xalid Ağaliyev məlumat verib.
X. Ağaəliyevin sözlərinə görə, Avropa Məhkəməsi verilən qərardan şikayət üzrə araşdırmalara başlayıb və bununla bağlı Azərbaycan hökumətinə sorğu ilə müraciət edib.
Xatırladaq ki, Qənimət Zahid saxta xuliqanlıq ittihamı ilə 2007-ci il noyabrın 22-də saxlanılmışdı. Onun ittiham olunduğu cinayətin ictimai təhlükəli olmamağına baxmayaqraq, jurnalist haqqında həbs qətimkan tədbiri seçilmişdi.
Onu da qeyd edək ki, daha sonra jurnalist Cinayət Məcəlləsinin 127.2.3 ( xuliqanlıq niyyəti ilə qəsdən sağlamlığa az zərər vurma ) maddəsi ilə ittiham olunaraq 3 il 6 ay, Cinayət Məcəlləsinin 221-ci maddəsi ilə ittiham edilməklə isə 6 ay olmaqla ümumilikdə, 4 il müddətində azadlıqdan məhrum edilmişdi. Azərbaycan Respublikasının Prezidentinin 17 mart 2010-cu il tarixli əfv sərəncamı ilə azadlığa buraxılıb.
“Azadlıq” qəzeti 1989-cu ildən çıxır və gündəlik qəzet kimi fəaliyyət göstərir.