Sadıqov əlavə edib ki, Avropa Birliyinin Cənubi Qafqaz üzrə xüsusi nümayəndəsi Piter Semnebi bir neçə başqa diplomatlarla birgə dünən (25 fevral) təcridxanada Fətulayevə baş çəkib. Baş redaktora dözümlü olmağı məsləhət görən diplomatlar onun azadlığa buraxılmağı ilə bağlı Azərbaycan hakimiyyətinə dəfələrlə müraciət etdiklərini, lakin müraciətlərin nəticəsiz qaldığını deyiblər.
“Medaiaforum” saytının Avropa İnsan Hüquqları Məhkəməsinə istinadən yaydığı məlumata görə Eynulla Fətullayevin şikayətinə martın sonunda baxılacaq. Belə ki, prosesin dəqiq vaxtının yaxın günlərdə müəyyənləşəcəyi bildirilib.
Əlavə edək ki, 29 dekabr 2009-cu ildə Fətullayevin üzərindən 0,223 qram heroin tapılıb. Eynulla Fətullayev və onun vəkili bu hadisəni yaxın zamanlarda jurnalistin həbsi ilə bağlı öz qərarını verəcək Avropa İnsan Haqları Məhkəməsinin qarşısını almaq məqsədilə əvvəlcədən qurulmuş əməliyyat kimi qiymətləndirir. Qaradağ Rayon Polis İdarəsinin İstintaq Şöbəsində barəsində Cinayət Məcəlləsinin 234.1(Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə cinayət işi açılan Eynulla Fətullayev yanvarın 2-də 2 saylı Bakı İstintaq Təcridxanasına köçürülüb.
Qeyd edək ki, 2005-ci ildən Eynulla Fətullayevin təsisçiliyi və baş redaktorluğu ilə “Realnıy Azerbaydjan” qəzeti həftəlik, “Gündəlik Azərbaycan” qəzeti isə gündəlik nəşr olunub. 2007-ci ildə baş redaktorun həbsindən sonra hər iki qəzet fəaliyyətini dayandırıb.