Bu gün Media Mərkəzində jurnalist Kamal Əlinin “Korrupsiyaya qarşı mübarizə yoxsa imitasiya” məqaləsinin müzakirəsi keçirilib.
Müəllif korrupsiya faktlarının üzə çıxarılmasında ailə üzvlərinin üzləşdiyi faktların kömək etdiyini deyib. Kamal Əli yaxın qohumlarının işi ilə əlaqədar müraciət etdiyi rəsmi qurumların fəaliyyətinə toxunaraq Miqrasiya xidmətində, Daşınmaz Əmlakın Dövlət Reyestri idarəsində rüşvət faktı ilə rastlaşmadığını qeyd edib. Amma dövlət yol polisi xidməti sistemində rüşvətin qaldığını, yol hərəkəti qaydasını pozduğuna görə 100 manat rüşvət verdiyini deyib. Övladları pasport almaq istədikdə 10 manat rüşvət verilməsi tələbi ilə üzləşdiyini bildirib.
Qaxda isə daha maraqlı hadisə baş verib. Belə ki, qoyunları oğurlanan fermer şikayət edib. Polislər kəndə gələrək ayrı-ayrı sakinlərin həyətindən 1-2 qoyun aparıblar. Vətəndaşlar səbəbini soruşanda polislər bunun “fermerin qoyunları”nı qaytarmaqla bağlı olduğunu deyiblər.
Eyni zamanda müəllif sosial müdafiə, kommunal xidmət sistemində rüşvətin qüvvədə qaldığını, üstəlik “korrupsiyaya qarşı mübarizə imitasiyası”na qədərki dövrdən qat-qat üstün olduğunu söyləyib. Faktlarla bağlı DİN-ə, DYPX-yə məlumat verəndə bu qurumlar rüşvət faktını inkar ediblər.
Yazar məhz bu faktlardan çıxış edərək hakimiyyətin korrupsiyaya qarşı mübarizəsini imitasiya adlandırıb, rüşvətin yenə də açıq müstəviyə çıxdığını deyib. Kamal Əli cəmiyyətin bütünlükdə rüşvətə qarşı ciddi mübarizə aparmadıqca bu bəlanın aradan qalxmayacağını nəzərə çatdırıb.