Ailə üzvləri Muxtar Respublika daxili işlər naziri Əhməd Əhmədovun xüsusi ittihamı əsasında ( http://www.nakhchivan.org.az/content/view/759/28/lang,az/) 1 il 6 ay müddətinə azadlıqdan məhrum edilən Novruz Əliyevlə görüşə bilmirlər.
Həbsindən 50 gün keçməsinə baxmayaraq qohumları onun vəziyyəti barədə heç bir məlumat əldə edə bilməyiblər. Bunu RATİ-nin Naxçıvan bölgə müxbirinə N. Əliyevin həyat yoldaşı Əliyeva Yasəmən Əsgər qızı bildirib.
“Onunla görüşmək üçün mütəmadi olaraq Ədliyyə Nazirliyinə müraciət etsək də bizə görüş verilmir. Yanvarın 18-də növbəti dəfə Novruzla görüşməyə cəhd etsək də yenidən görüş verilmədi. Dedilər ki, bu gün cəzaçəkmə müəssisəsinə köçürüləcək. Görüşə imkan yaranan kimi özümüz sizə zəng edib xəbər verəcəyik. Amma bu günə qədər bizə zəng edib bir söz deyən olmayıb. Nazirlikdən onun səhhətinin yaxşı olduğunu dedilər. Amma həyat yoldaşımla görüşməsəm buna inana bilmərəm. O ağır şəkər diabeti xəstəsidir. Bu bizim narahatçılığımızı bir qədər də artırır”, – deyə Y. Əliyeva bildirib.
Xatırladaq ki, Babək rayon Qahab kənd sakini 58 yaşlı Novruz Əliyev 2008-ci dekabr ayının 3-də Naxçıvan şəhər Məhkəməsində hakim Hicran Muradovun sədrliyi ilə keçirilən məhkəmə prosesində Azərbaycan Respublikası Cinayət Məcəlləsinin 147.2 (ağır və ya xüsusilə ağır cinayətdə ittiham etməklə böhtan atma) maddəsi ilə təqsirli bilinərək bir il altı ay müddətinə azadlıqdan məhrum edilib. O, bu cəzaya Muxtar Respublika daxili işlər naziri Ə. Əhmədov barədə Azərbaycan Respublikası prezidenti İlham Əliyev və daxili işlər naziri Ramil Usubova yazdığı şikayət ərizəsində səsləndirdiyi fikirlərə görə məhkum edilib.