Hüquq müdafiəçiləri Səidə Qocamanlı və Səadət Bənənyarlı dünən 12 saylı cəzaçəkmə müəssisəsində olmuş və “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayevə baş çəkmişlər.
S. Qocamanlı APA-ya açıqlamasında 8 gündür aclıq edən jurnalistin səhhətini normal qiymətləndirsə də, bir neçə gündən sonra onun səhhətində fəsadların ortaya çıxacağını vurğulayıb.
Daha sonra hüquq müdafiəçiləri 13 saylı cəzaçəkmə müəssisəsində cəza çəkən sabiq səhiyyə naziri Əli İnsanovla da görüşüblər. Görüşdə sabiq nazir bildirib ki, jurnalistlərin aclıq aksiyasına dəstək məqsədilə aprelin 3-dən aclığa başlayacaq. Və bununla bağlı müəssisə rəhbərliyinə müraciət edəcək.