ZAHİDOVUN VƏKİLİNƏ SUİ-QƏSD EDİLİB

mart 17th, 2008
Martın 15-də “Azadlıq” qəzetinin həbs edilmiş baş redaktoru Qənimət Zahidovun vəkillərindən biri olan Osman Kazımova qarşı 3 nəfər naməlum şəxs  tərəfindən hücum edilib.

Osman Kazımovun RATİ-yə verdiyi məlumatına görə, bu hadisə axşam saat 21.00 radələrində vəkilin mənzilinin  yaxınlığında baş verib. Vəkil qeyd edib ki, “evdən çıxıb 200 metr irəlilədikdən sonra 3 nəfər mənə yaxınlaşdı və onlardan biri Naxçıvan ləhcəsində “sən  qudurmusan” ifadəsini işlətdi. Bundan sonra həmin şəxslər hücuma keçdilər, onlarla əlbəyaxa oldum. Birinin zərbəsini dəf etsəm də, digəri təpiklə ayağıma zərbə endirdi. Lakin bu müqavimətdən sonra onlar məni təhqir edərək və hədələyərək uzaqlaşmağa başladılar”. Kazımov bu hadisənin kim tərəfindən törədildiyi barədə onda heç bir məlumatın olmadığını, hadisə barədə mətbuata və vəkillər kollegiyasına məlumat verdiyini bildirib.