Baş Prokurorluq 4 mart 2011-ci il tarixdə gənc fəal Bəxtiyar Hacıyevin saxlanılan vaxt fiziki hücuma məruz qalması faktı barədə cinayət işi açmaqdan imtina edib. Bu barədə bu gün (29 mart) Reportyorların Azadlıq və Təhlükəsizlik İnstitutuna (RATİ) gənc fəalın vəkili Əlayif Həsənov məlumat verib.
“Prokurorluğun gəldiyi nəticə araşdırmanın düzgün aparılmadığını göstərir. Bu barədə mənə və Bəxtiyar Hacıyevin digər vəkilinə rəsmi bildiriş daxil olmayıb. Amma hal-hazırda əlimdə 2 saylı İstintaq Təcridxanasının tibbi xidmət üzrə rəisinin aktı var və burada gənc fəalın fiziki hücuma məruz qalması əks olunub. Mən prokurorluğa təkrar müraciət edərək, araşdırmanın obyektiv aparılmasını xahiş edəcəyəm”deyə Həsənov bildirdi.
Xatırladaq ki, Bəxtiyar Hacıyev Cinayət Məcəlləsinin 321.1-ci (hərbi xidmət keçməkdən boyun qaçırma) maddəsi ilə ittiham olunur. Barəsində 1 aylıq həbs qərarını martın 4-də Gəncə şəhər Nizami rayon Məhkəməsi çıxarıb. 2010-cu ilin noyabrında keçirilmiş parlament seçkisində 17 saylı Yasamal üçüncü seçki dairəsindən deputatlığa namizəd olmuş Bəxtiyar Hacıyev seçkidən bir neçə gün sonra, noyabrın 17-də təhsilini davam etdirmək üçün Gürcüstana getmək istəyərkən Qazax rayonunun Qırmızı Körpü sərhəd-keçid məntəqəsində saxlanmışdı. O zaman Konstitusiya Məhkəməsi seçkinin nəticələrini hələlik təsdiq etmədiyindən deputatlığa namizəd statusunda olan Bəxtiyar Hacıyev bir gün sonra həbsdən azad edilmişdi. Hüquq müdafiəçilərinin fikrinə görə isə BəxtiyarHacıyev sosial şəbəkələrdəki fəallığına və xüsusilə bir qrup gəncin başladığı “11 mart böyük xalq günü” kampaniyasına texniki dəstək verdiyi üçün həbs edilib.