Noyabrın 25-də saat 21:20 radələrində “Gündəlik Bakı” qəzetinin redaksiyasına hədə zəngi edilib. Bu barədə bu gün (29 noyabr) Reportyorların Azadlıq və Təhlükəsizlik İnstitutuna (RATİ) “Gündəlik Bakı” qəzetinin baş redaktor müavini Vazeh Bəhramoğlu (Mehdiyev) məlumat verib.
“Özünü Bakı Dövlət İqtisadiyyat və Humanitar Kollecinin direktoru Bilman Vəliyevin qohumu kimi qələmə verən Zaur adlı şəxs redaksiyaya zəng edərək, redaksiyanı partladacaqlarını, bizi yox edəcəkləri deyərək bizi hədələdi”, deyə qeyd edən V. Bəhramoğlu bütün bu hədələrin qəzetin səhifələrində vaxtaşırı Bakı Dövlət İqtisadiyyat və Humanitar Kollecinin direktoru Bilman Vəliyev haqqında gedən yazılarla bağlı olduğunu istisna etmədiyini bildirdi.
O, hadisə barədə Daxili İşlər Nazirliyinin (DİN) “102” Xidmətinə və Yasamal rayon Polis İdarəsinin 27-ci Polis Bölməsinə ərizə ilə müraciət edildiyini də dedi.
Daxili İşlər Nazirliyinin mətbuat xidmətinin rəis müavini Ehsan Zahidov RATİ-yə hadisənin nazirliyin nəzarətində olduğunu və araşdırmaların aparıldığını bildirdi.
Qeyd edək ki, “Gündəlik Bakı” qəzeti 2007-ci ildən fəaliyyətə başlayıb və gündəlik dərc olunur.