“Gündəlik Bakı” qəzetinin əməkdaşı Habil Vəliyev Daxili İşlər Nazirinin müavini, polis general-leytenantı Əsgər Ələkbərovun qohumu olduğunu bildirən Araz adlı şəxsin və Əsgər Ələkbərovun qardaşı Fərhad Ələkbərovun adına olan “Fərhad ” şadlıq sarayında baş inzibatçı işləyən şəxsin fiziki təzyiqinə məruz qalıb.
“17 sentyabr saat 12 radələrindən başlayaraq saat 5-6 radələrinə qədər müxtəlif nömrələrdən mənə zəng gəlirdi. Keçmiş Qazax «OMON»un komandiri, ömürlük məhbus Elçin Əmiraslanov və onun bacısı Şəhla Əmiraslanova ilə bağlı qəzetimizdə məlumatlar gedib və buna görə də Elçin Əmiraslanovun bacısının həyat yoldaşı Bünyəmin adlı şəxs mənə zəng etdi və məni hədələdi. Daha sonra mən saat 9 radələrində “Fərhad ” şadlıq sarayına toya getmək üçün yola çıxdım. Yolda olarkən qara bir cip markalı avtomobilin məni təqib etdiyini gördüm. DİN-nin 102 xidmətinə zəng etdim, məni təqib etdiklərini bildirdim və maşının təqibindən xilas olaraq şadlıq sarayına çatdım. Bir az keçməmiş restoranın baş inzibatçısı və Araz adlı şəxslə mənim aramda qısa müddətli insident yaşandı. Toyda bir qədər qalandan sonra saraya çoxlu adamlar daxil oldular və məni zorla çıxartmaq istədilər. Mən qəti şəkildə müqavimət göstərdikdən sonra onlar məni çöldə gözləməyə davam etdilər. Restorandan çölə çıxan kimi çoxlu sayda şəxs mənə hücum etdi və məni döyməyə başladılar. Əgər idmançı olmasaydım çətin ki onların əlindən sağ qurtula bilərdim”, -deyə Habil Vəliyev bildirib.
H. Vəliyev onu da bildirdi ki, polis əməkdaşları onları 13-cü polis bölməsinə apararaq ərizə yazmalı olduğumu bildirdilər və polis bölməsinə gələn Əsgər Ələkbərovun qardaşı Fərhad Ələkbərov ərizə yazmağıma mane olmaq istəyirdi.
“O həm məni, həm də polis bölməsinin əməkdaşlarını hədələdi və təhqir etdi. Polis bölməsində ərizəmi təqdim etdikdən sonra məni ekspertizaya göndərdilər. Ekspertizadan keçdim və Sabunçu Rayon Ekspertiza Şöbəsindən isə bildirdilər ki, rəyi daha sonra almalıyam, çünki şöbənin rəisi yerində deyildi”, -deyə Vəliyev əlavə edib.
Jurnalist onu da qeyd etdi ki, hadisə ilə bağlı ölkə prezidentinə və güc strukturlarına müraciət edib.