Sentyabrın 26-da gün Lənkəran Ağır Cinayətlər Məhkəməsində Salyanda fəaliyyət göstərən “Demokratiyaya Yardım” qeyri-hökumət təşkilatının rəhbəri Emil Məmmədovun işi üzrə hökm oxunub.
Məhkəmə onu və bu QHT-nin digər üzvü Tofiq Qasımovu şərti olaraq 2 il azadlıqdan məhrum edib. Onlar məhkəmə zalından buraxılıblar.
Bu barədə Reportyorların Azadlıq və Təhlükəsizlik İnstitutuna (RATİ) vəkil Fariz Namazlı bildirib.
Qeyd edək ki, dünən prokuror onların 2 il şərti olaraq azadlıqdan məhrum edilməsini istəmişdi.
Onu da qeyd edək ki, Emil Məmmədov prezidentə müraciət etmiş və işinə diqqət yetirməsini xahiş etmiş və onun siyasətini dəstəklədiyini bildirmişdi.
Xatırladaq ki, E.Məmmədov bu il mayın 13-də polis tərəfindən saxlanılıb və pul almaqda (182.2.2-ci maddə) ittiham olunur. Bundan əvvəl isə T.Qasımov həbs edilib. Həmin maddə üzrə onların hər ikisini 10 ilədək azadlıqdan məhrum olunma cəzası gözləyirdi.