Polis özbaşınalığından şikayət edən Sədərək rayon Heydərabad kənd sakini 56 yaşlı Vəliyev İbrahim və həyat yoldaşı Vəliyeva Türkan 12 yanvar 2009-cu il tarixdə saat 11:00 radələrində Sədərək rayon Polis Şöbəsinin əməkdaşları tərəfindən Polis Şöbəsinə aparılıb.
Bir sutkadan artıq vaxt keçməsinə baxmayaraq onlar hələ də Polis Şöbəsində saxlanılır. Polis Vəliyevləri nə üçün saxladığını da açıqlamır. Məlumatı RATİ-nin Naxçıvandakı müxbirlərinə İbrahim Vəliyevin oğlu Afiq Vəliyev verib.
“Dünən valideynlərimi Polis Şöbəsinə apardılar. Gecəyə qədər şöbənin qarşısında gözləsək də onları buraxmadılar. Səhər saat 05:00 -da evə qayıtmışam. Hələ də valideynlərimdən bir xəbər yoxdur. Onların hansı səbəbdən saxlandıqlarını öyrənə bilmirik”, – deyə A.Vəliyev bildirib.
Məsələyə aydınlıq gətirmək üçün Sədərək rayon Polis Şöbəsi ilə telefon əlaqəsi yaratmağa çalışsaq da gün ərzində zənglərimizi cavablandıran olmadı.
Xatırladaq ki, 24 dekabr 2008-ci il tarixində bir qrup gənc əsassız olaraq (http://www.nakhchivan.org.az/content/view/762/28/lang,az/) Sədərək rayon Polis Şöbəsinə aparılaraq səhərə qədər orada saxlanılmışdı. Polis Şöbəsində gənclərə qarşı fiziki, mənəvi və psixoloji təzyiqlər edildiyi üçün onların valideynləri Azərbaycan Respublikası Daxili İşlər Nazirliyinə, Azərbaycan Respublikası prezidentinə şikayət (http://www.irfs.az/component/option,com_datsogallery/Itemid,30/func,detail/catid,175/id,1755/lang,az/) ərizəsi yazıblar. Vəliyev İbrahim və həyat yoldaşı Vəliyeva Türkan da həmin valideynlər sırasındadır. Bir müddət bundan əvvəl isə Sədərək rayon Su Təsərrüfatı İdarəsində mexanizator (traktor sürücüsü) işləyən İbrahim Vəliyev işdən qovulmuşdu. Habelə valideynlərdən I qrup gözdən əlil Həsənov İsmayıl Süleyman oğlu da polis tərəfindən saxlanılmışdı və sonradan o Ruhi Xəstəliklər Dispanserinə yerləşdirilib. Onun həyat yoldaşı II qrup əlil Həsənova Xanımzər Abo qızı və oğlu I qrup əlil Həsənov Elvin isə 6 gündür ki, yoxa çıxıb.