Bu gün (12 may) Bakı Apellyasiya Məhkəməsində hakim hakim Sevda Hüseynovanın sədrliyi ilə Azərbaycan Dövlət Neft Akademiyasından (ADNA) xaric olunmuş tələbə Elmin Bədəlovun ADNA-ya və onun rektoru Siyavuş Qarayevə qarşı ikinci məhkəmə iddiası üzrə Nəsimi rayon Məhkəməsinin 2 fevral 2011-ci il tarixli qərarından verilən apellyasiya şikayəti üzrə məhkəmə prosesi keçirildi. Bu barədə Reportyorların Azadlıq və Təhlükəsizlik İnstitutuna (RATİ) E. Bədəlovun özü məlumat verib.
E. Bədəlov bildirdi ki, onun nümayəndəsi Fariz Namazlı ADNA-nın nizamnaməsində tələbənin qalıq biliyinin yoxlanılmalı olduğunun göstərilmədiyini məhkəmənin diqqətinə çatdırıb. Cavabdeh tərəf isə bu fikri təkzib edib. Cavabdeh tərəf bildirib ki, Bədəlov 1, 2 və 3-cü kurslarda keçdiyi fənlərdən imtahan versə 4-cü kursu yenidən oxuya bilər. Bədəlov isə öz növbəsində qeyd edib ki, həmin fənlərdən qiymət almışam və buna görə də təzədən imtahan vermək kimi bir məcburiyyəti yoxdur. Hakim Sevda Hüseynova cavabdeh tərəfdən təkziblərini sübut edə biləcək sənədləri məhkəməyə təqdim etmələrini tələb edib və növbəti prosesi 2 iyun saat 14:15-ə təyin edib
Xatırladaq ki, “Yeni müsavat” qəzetinin əməkdaşı Elmin Bədəlov 19 yanvar 2010-cu ildə Azərbaycan Dövlət Neft Akademiyasından xaric olunub. O, 12 noyabr 2009-cu il tarixdə təhsil müəssisəsindəki rüşvət halları və maliyyə fırıldaqları ilə bağlı pia.az
saytında “Azərbaycan Dövlət Neft Akademiyasından reportaj”
adlı məqalə yazdıqdan sonra təzyiqə məruz qaldığını bildirir və imtahanlardan qərəz nəticəsində kəsildiyini iddia edir. Pozulmuş təhsil hüququnun bərpa edilməsi üçün Nəsimi rayon Məhkəməsində Azərbaycan Dövlət Neft Akademiyasına və rektor Siyavuş Qarayevə qarşı iddia qaldırsa da, 05 aprel 2010-cu ildə iddianın təmin edilməməsi ilə bağlı qərar çıxarılıb. 2 iyul 2010-cu il tarixində Bakı Apellyasiya Məhkəməsi Nəsimi rayon Məhkəməsinin 5 aprel 2010-cu il tarixli qərarının qüvvədə saxlayaraq, şikayəti təmin etməyib. Ali Məhkəmə 23 noyabr 2010-cu il tarixində kassasiya şikayətinin təmin edilməməsi barədə qərar verib. ADNA və onun rektoruna qarşı ikinci məhkəmə iddiasını Nəsimi rayon Məhkəməsi 2 fevral 2011-ci ildə təmin etməyib.